Testigo sa last will makadawat ba og share?

Dear Atty. Divine,

Duna ko’y pangutana labot sa Last Will sa akong uyoan. Ulitawo ang akong uyoan ug sa dihang kini namatay, nagbilin kini og Last Will, ug apil sa iyang gibinlan sa iyang property mao ang akong igsuon nga apil sab sa nagsilbing testigo sa maong Last Will.

Apan matud pa sa akong iyaan nga mahimong kuwestiyonon ang share sa akong igsuon kay matud niya ang witness sa Last Will and Testament, dili mahimong modawat usab og share sa gibilin sa testator. May basehan ba ang gisulti sa akong iyaan? Daghang salamat. — Rhea

 Dear Rhea,

Ang Last Will and Testament nagkinahanglan og at least, tulo ka subscribing witnesses, nga sa ato pa mahimong tulo ka testigo, upat or lima, basta dili momenos sa tulo. Sa kaso sa Last Will sa imong uyoan nga diin ang usa sa imong igsuon apil sa mga testigo ug usa sab siya sa gibinlan, ang imong pangutana kun may basehan ba ang gisulti sa imong iyaan nga dili makadawat sa iyang share ang imong igsuon.

Ang tubag niini, magdepende kun pila ka testigo ang mipirma sa Last Will kay kun upat o lima sila ka testigo, then mahimong makadawat sa iyang share ang imong igsuon ug dili siya ma-disqualified sa pagkuha sa iyang share, apan kun tulo ra sila ka testigo, apil na ang imong igsuon, hayan ma-disqualified g’yud siya sa pagdawat sa iyang share kay mahimo man unya nga void ang Last Will kun dili moabot og tulo ang testigo niini. Thanks and God bless. -Atty. Divine

* * *

 Alang sa inyong pangutana ipadala lang sa Legal Corner sa Banat New sa V. Gullas St., Cebu City or email sa flores_divina@ yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.