Wala na magpakita ang bana nga langyaw

Dear Atty. Divine,

Duna ko’y pangutana labot sa akong marriage sa foreigner. Naminyo mi niadtong 2008 ug duna mi usa ka anak nga karon 7 years old na. At first, magsige pa og ari sa Pilipinas ang akong bana ug nagsuporta sab siya namo matag buwan. But sa dihang nag 5 years old na ang among anak, wa na man siya mobisita namo ug wa na mopadala og kuwarta.

Dili na siya makontak sa iyang phone ug dili na mo-reply sa email. Unsay akong buhaton aron makapangayo ko og support? Ang akong anak adunay US passport kay iya man kini nga gikuhaan. Hinaot nga imong mi nga matabangan. Daghang salamat.  — Rachel

Dear Rachel,

Base sa balaod obligado ang imong bana nga mosuporta kanimo ug sa imong anak. Mahimo gani nga ikiha ang amahan sa bata og kalapasan sa Anti-Violence Against Women and their Children kon magdumili kini sa paghatag og financial support. Ang problema sa imo nga kaso kay wa diri ang imong bana ug wa sab ka masayod sa iyang nahimutangan karon.

Kon wa sa Pilipinas ang imong bana, maglisud ka sa pag-file og kaso kaniya kay dili man maka-acquire og jurisdiction ang korte niya. Ang maayo nimong buhaton mao ang pagduol og abogado aron magpahimo ka og demand letter for support ug imong ipadala sa iyang last known address.

Kon dili siya mo-reply, then mopasaka g’yud ka og kaso niya apan kinahanglan g’yud nga imong kuhaon ang address sa iyang nahimutangan karon. Kon tua siya sa gawas sa nasud dili g’yud makasibog ang kaso gawas lang kon moari siya sa Pilipinas ug ma-serve ang summon ngadto kaniya. Thanks and God bless! —  Atty Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina @yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.