Tax amnesty

Nindot ni kon ipatuman dinhi sa atong dakbayan, ug kon maoy buhaton sa kadagkoan sa Cebu City Hall. Makaginhawa na’g luag ang atong mga negosyo, ilabi na kadtong wala’y mga business permit. Tax amnesty.

Atong ma-imagine nga gumikan sa red tape nga mahiaguman sa mga negosyante, daghan kanila ang mo-gamble na lang pag-operate without a business permit.

Meaning, tapus sa amnesty, human makabayad ang mga tax delinquent taxpayer sa tukma nilang bayranan, tagdon dayon sa City Hall ang pagpasayon paglukat og business permit, pag-encourage sa mga negosyante sa dili paglikay niini.

Matud ni Mayor Tomas Osmeña, ila kining gitun-an karon, ilabi na ang bahin sa pag-waive ba sa penalty. Sa iyang proposed ordinance, buot ni Konsehal Jocelyn Pesquera, among others, nga i-condone ang interest sa wala mabayri nga real property taxes.

Matud ni Pesquera, kasagaran sa mga real property nasunod lang sa mga heridero, nga nagtangag na og taas nga penalty ug mga surcharges. Maayo ang lakang sa Konseho ug hinaot nga mapatuman kini sa executive department.

As of September 2015, aduna na’y kapin sa 69 mil ka delinquent real property taxpapers. Pila na kaha kini sila karon? In the meantime, idol kining maong mga lote, nga kon mapahigayon na ang tax amnesty ma-productive na ang maong mga kabtangan.

* * *

Nindot ug tayming kining pahimangno ni Presidente Digong Duterte ngadto sa kadagkoan sa gobiyerno, nga mga alagad lang sila sa katawhan, mga suloguon sa lungsod ug dili mga agalon, dili espesyal nga mga molupyo sa nasud.

Exact words sa presidente: “You’re not special, you’re just working for the people.” Tukma kaayo. Padayon: “That’s why don’t treat us special. We are just like anybody else. We are just ordinary people. We are just workers.” Tinuod kaayo. Ambot  ngano nga ang uban kanila, magpa-espesyal man?

As an example, dili siya buot nga ang mga sakop sa iyang Cabinet magtiner og special nga plaka sa ilang mga sakyanan. Wala’y number 1, walay number 6, ug tinguha ni Duterte nga ang mga “government official should live in a simple lives.”

Simple lives? Mahimo kaha ni sa atong mga opisyal sa gobiyerno nga inay moangkon nga mga alagad lang sila sa katawhan, mga public servants (sumala sa ilang ipasiatab panahon sa eleksiyon), apan ang ilang mga actuation mga public masters man?

Unta “24 hours a day” ang ilang pagserbisyo. Apan, unsaon nga dili gani sila motubag sa telepono!