As-Salaam-Alaikum

Natapos kagahapong adlawa ang tulo ka adlaw nga kasaulogan sa Eid’l Adha, kun feast of sacrifice sa atong kaigsoonan nga mga Muslim.

Gideklarar sa Malacañang nga regular holiday kaniadtong Biyernes nunot sa naasoy’ng selebrasyon diin usa sa akong nabisita ang mosque sa Barangay Pajo sa dakbayan sa Lapu-Lapu.

As-Salaam-Alaikum, kun peace be upon you. Kini ang mainiton nga pagtimbaya nila kanako.

Samtang akong nakita kon unsa ka sinsero ang atong mga Muslim brothers sa ilang paghandom sa sakripisyo sa ilang propeta ug ang paghatag nila og dako nga importansya sa kalinaw.

Kini ang usa sa giampo nila atol sa pagsaulog sa Eid’l Adha nunot sa nagpadayon nga kagubot didto sa Marawi City.

Dili malikayan nga mahingawa sila sa nahitabo sa ilang mga kadugo didto sa Mindanao nga miserable ang kahimtang.

Nanghinaot sila nga mahuman na ang kasamok nga naghatag og kalbaryo sa mga apektadong molupyo sa yuta nga gihamok sa kagubot.

Ang lider sa Muslim community sa Pajo nga si Hadji Hamza Badio mipadayag nga wala’y luna kanila ang terorismo ug hingpit nila kining gikondenar tungod kay mao kini ang hinungdan sa pag-antos sa mga tawo.

Labaw sa tanan, mahigugmaon sila sa kalinaw ug gusto nila kining makita sa katilingban.

Ang pagkab-ot sa kalinaw, wala magdepende sa grupo, ma-Muslim man o Kristiyano, kon dili, ang kahiusahan sa tanan pagpakigbatok sa kadautan.