Ngano nga wala moundang?

Daghan na ang gipatay ug gipriso gumikan sa pagkalambigit sa gidili nga drugas. Apan bisan pa man sa kadaghan na sa gipatay ug gipangpriso tungod sa pagkalambigit sa gidili nga drugas, daw sa wala mahurot ang  gidaghanon sa mga nagpayuhot niini.

Bisan sa pahimangno sa gobiyerno sa pagbiya sa pagpamaligya ug sa paggamit sa gidili nga drugas, wa g’yud sila mobiya, ug gani ang mga miboluntaryo sa pagtahan sa ilang kaugalingon sa kapolisan namalik na hinuon sa ilang naandan nga gidiling negosyo.

Ngano man? Sigun sa akong nahibaw-an, ang mga nasulod sa sindikato sa gidili nga drugas maglisud na sa pagbiya tungod sa ilang seguridad. Wa na sila’y kapilian gawas sa pagpabilin na lang niini gumikan kay nasusama sila sa bibingka.

Ang namaligya sa drugas dakpon, unya kon magkalisod, posible pa nga patyon o mapatay sa mga polis. Kon moundang pud sila sa pagpamaligya, ipapatay o ipahipos pud sila sa sindikato tungod sa ilang nahibaw-an sa gidili niini nga negosyo. Mao nga magpabilin na lang g’yud sila ug paaboton na lang ang unsa may mahitabo sa unahan.

Laing rason nga akong nahibaw-an mao nga dali ra ang kuwarta sa gidili nga drugas. Sama ni Franz  Sabalones nga giingon sa mga polis nga sulod lang sa 12 ka tuig nga pagpamaligya og gidili nga drugas, nakatigum og mga P350 milyones nga salapi ug kabtangan. Pero, dako ang posibilidad nga mobalik sa iyang pagkapobre si Franz Sabalones kay gisugdan na sa pagbira sa gobiyerno ang iyang natigom nga salapi ug mga kabtangan nga iyang naangkon gikan sa gidili nga drugas.

Tambag nako, ayaw na lang g’yud mo pag-apil sa sindikato sa gidili nga drugas aron dili ka masusama nila. Sayang ang pagtigum og salapi nga ang imong mga tiil anaa sa bung-aw sa kamatayon ug prisohan, unya pagkahuman, birahon ra diay sa gobiyerno. Maayo pa’y wa na lang.