Mga oportunista

Misilaob pagbalik ug misamot pa kainit ang isyu sa extra-judicial killings (EJK) sa nasud, nunot sa sagunson nga kamatayon sa mga tawo nga nalambigit sa ilegal nga drugas.

Nagsilbe nga pabilo sa kapungot sa mga tawo ang kamatayon sa grade 11 student nga si Kian Lloyd delos Santos, 17-anyos, nga gipatay sa tulo ka polis didto sa Caloocan City.

Gani, sa newsfeed sa social media, halos “justice for Kian”, Anak ko si Kian, ug uban pa nga hastag ang akong nabasahan isip pagpakita sa ilang simpatiya sa biktima.

Wala ug tuo usab ang lihok protesta nga gipahigayon sa nagkadaiyang grupo sa mga batan-on, estudyante ug mga professionals, lakip na ang nagkadaiyang militanteng grupo.

Mitingog na usab ang inpluwensyado nga simbahang Katoliko batok sa dugoon nga drug war sa gobiyerno.

Alang sa pamilya ug mga supporters ni Kian, inosente kini kay usa ka buotan nga anak, ug maayong tawo. Biktima kuno si Kian sa linuog nga pamaagi sa gobiyerno pagpuo sa mga tawo nga nalambigit sa drugas.

Dili kita makabasol sa nag-alintabo nga kalagot sa mga tawo nga nakisimpatiya sa batan-on. Apan mas maayo nga hulaton nato usa ang resulta sa imbestigasyon aron mabati usab nato ang argumento sa pikas habig nga mao ang kapolisan.

Kon nakahimo og sala ang mga nalambigit nga polis, angayan lang nga sila silotan.

Apan dili nato idamay ang tibuok nga drug program sa kagamhanan. Angkunon man nato, o dili, layo na kaayo kini og naabtan.

Labaw sa tanan, magmatngon kita nga dili magpadala sa anod, sa mga tawo nga misakay lang niini nga isyu, tungod sa ilang personal interes. Sila ang mga oportunista.