EDITORYAL - Napagan sab si Taguiwalo
Nakita ug naklaro na karon kon unsa’y tinud-anay nga kolor sa mga kaalyado ni Presidente Rodrigo Duterte diha sa Kongreso, partikular na ang mga naglangkob sa Commission on Appointments (CA). Asa ba g’yud sila pusta ug kang kinsa nga interes ang ilang gipatigbabaw? Nakita kini atol sa hearing sa appointment ni Judy Taguiwalo, ang gitudlo ni Duterte nga kalihim sa Department of Social Welfare and Development.
Sa ikatulo ug katapusang higayon, gi-reject sa 13 sa 25 ka sakop sa CA gikan sa Senado ug Lower House ang konpirmasyon sa iyang appointment. Atol sa CA hearing, ang mga sakop mismo sa Liberal Party mao pa hinuon ang nibotar sa tinudlo ni Duterte, apan ang mga kapartido sa pangulo wala mobotar kang Taguiwalo. Unsa’y nakita sa mga taga LP kang Taguiwalo nga wala makita sa mga kaalyado ni Duterte diha sa CA? Kon si Taguiwalo maoy pasultihon, aduna siya’y mga gidudahang hinungdan kon ngano nga wala siya konpirmaha sa CA.
Sama kang Gina Lopez nga aktibistang environmentalist, si Taguiwalo naila usab sa iyang pagka-aktibista nga nakigbisog batok sa bulok nga sistema. Nominado siya sa National Democratic Front (NDF) sa mao nga posisyon. Si Taguiwalo tang-an na usab sa panerbisyo, ilabi na sa social service. Gipapadayon ug gipalambo pa g’yud niya ang mga nasugdang conditional cash transfers (CCT) sa gobiyerno alang sa mga kabus nga pamilya. Adunay mga report nga daghang kongresista ang nasuko kang Taguiwalo kay dili kini motugot og mga “referrals” gikan sa mga politiko alang sa mga tawo nga modangop sa DSWD.
Ang hinabang sa DSWD wala man tingali magkinahanglan og referrals aron i-release. Kining CCTs, gihimo karong pangdani ug puhonan sa mga politiko aron mohumot sila sa mga botante. Kining wala pagkonpirmar kang Taguiwalo, kawad-on kini sa gabinete ni Duterte. Unsaon na lang kining tinguha sa presidente nga maghiusa ang tanan bisan unsa pa’y baruganan ug relihiyon sa pagpadagan sa gobiyerno.
- Latest