Operation dakop sa TNVS

Sinkwentay-uno na ka mga Uber ug Grab operated vehicles ang na-impound sa Land Transportation Office ug LTFRB-7 dinhi sa Sugbo.

Gipadayag ni Director Alita Pulga,  Land Transportation Office (LTO) 7  nga kabahin kini sa hugot nila nga kampanya batok sa mga kolorum nga mga sakyanan sa Sugbo.

Giklaro sa opisyal sa LTO nga ilegal gihapon ang pagpamasahero sa Uber ug Grab tungod kay wala pa kini pagtugot sa LTFRB.

Subay niini gipanghimug-atan ni Pulga nga ipatuman nila ang balaod pinaagi sa pagpanakop sa Transport Network Vehicle Service (TNVS).

Pahamtangan og P120 mil nga multa ug i-impound sulod sa tulo ka buwan ang masakpan nga TNVS kon awto apan P200 mil kon van ang sakyanan.

Akong gipangutana si Pulga nganong initan man nila ang Uber ug Grab nga naghatag man kini og panginabuhi sa katawhan.

Gani ang uban mi-resign sa trabaho kay nag- concentrate sa TNVS kay mas dako man ang kita.

Mubo ra ang tubag sa LTO, “tungod kay kolorum man sila nga angayan dakpon.”  Ang tanan nga mga sakyanan nga mamasahero nga walay permiso gikan sa LTFRB panakpon ug dili exempted niini ang Uber ug Grab.

Pastilan daghan na ra ba nahinayak sa pagpangutang og sakyanan alang sa Uber ug Grab unsaon na lang. Apan ang balaod, balaod gyud alang sa tanan.