Hapit na usa ka milyon

Ang rason nga grabe na kaayo ang problema sa trapiko karon, ilabi na dinhi sa dakbayan sa Sugbo, tungod kay ang gidaghanon sa mga sakyanan nga narehistro dinhi sa Central Visayas, miabot na og 726,028.

Kana, wala pa’y labot sa mga sakyanan nga didto marehistro sa ubang mga dapit sa nasud apan ania dinhi gipadagan-dagan. Ang plate number sa mga sakyanan nga dia marehistro sa Central Visayas nagsugod sa letra nga G ug Y. Kon makakita mo og lain nga letra, didto kana marehistro sa ubang bahin sa nasud.

Apan karon, mas sayon na ilhon ang mga sakyanan kon asa kini marehistro kay sa ubos sa plaka, makita nimo ang rehiyon, pananglit “Region 7.”

Tan-awon nato kon unsa nga mga sakyanan ang bag-ong narehistro dinhi sa rehiyon sa miaging tuig. Mga bag-ong kotse 11,578 nga nadugang sa 42,715 nga igo lang gi-renew; bag-ong pasaheroan 14,432 nga nadugang sa 128,649; mga SUV 6,069 nga nadugang sa 22,774; bag-ong trucks 2,484 nga nadugang sa 25,937; bag-ong bus 26 nga nadugang sa 1,741; bag-ong motorsiklo 127,841 nga nadugang sa 308,414; tricycle 697 nga nadugang sa 29,205 ang uban wa na lang nako iapil.

Ang narehistro lang na, wala pa’y labot sa mga sakyanan nga gipadagan-dagan nga wala na ipa-renew ang rehistro. Kaniadto, ang gidaghanon sa mga bag-ong sakyanan nga marehistro dinhi sa rehiyon, moabot lang og kapin sa 20 mil kada tuig, apan sa miaging tuig niabot na og 35,286 ka bag-ong sakyanan, apil ang surplus, nga giparehistro.

Angayan g’yud unta nga ang tagdumala sa Department of Transportation mangita g’yud og paagi nga masulbad ang trapiko pinaagi sa pagpalapad sa karsada, ug ang pagmugna og mga sakyanan nga adto sa ibabaw mag-agi, usa sa laing pamaagi.

* * *

Unya, gipahibalo sab sa kadagkoan sa Land Transportation Office (LTO) nga niabot og 22,253 ka masalaypong driver ang nadakpan nila sa miaging tuig. Kaniadtong 2015 niabot lang og 6,552 ang ilang nadakpan.

Kanindot kon pirmehon sa mga road law enforcers ang pagpanakop kay puwerteng daghana nga dakponon. Kana gyud nga makakita ko og drayber nga ari na mopadagan sa pikas nga “lane” dili ko lang tuyoon ang pagpangagot sa akong ngipon.

Nakaingon ko nga kon deputized agent pa ko sa LTO, tudloan g’yud nako og leksyon ang maong driver.

Daghan g’yud kaayong mga driver nga dakponon apan wala lang mahimoi og aksyon kay ang LTO na lang ang manakop, unya dili makaato sa dakponon.