Clamping ug towing

Gipahibalo ko ni Mayor Tomas Osmeña nga ang dakbayan sa Sugbo mamalit og daghang clamp aron gamiton pag-clamp sa mga sakyanan nga ipataka lang pag-park sa lainlaing mga karsada sa siyudad sa Sugbo.

Nalipay sab ang mayor diha nga akong gipahinumdoman nga angay na nga ang dakbayan mobanhaw sa towing operations, pinaagi sa pagguroy niadtong mga sakyanan nga ipataka pag-park ug makahasol sa mangagi nga sakyanan.

Karon nga majority na ang mga konsehal nga alyado sa Bando Osmeña Pundok Kauswagan (BOPK) diha sa City Council, dili na maglisud si Mayor Osmeña sa pagpalabang sa tinguha nga ibalik ang towing operations.

Hinoon, sa among panagsulti ni Konsehal Joel Garganera, ang usa sa vocal kaayo nga sakop sa Team Rama, iya ko nga gipasaligan nga suportahan niya ang pag-clamp sa mga sakyanan basta tumanon lang ang mga lagda.

Ikaduha, kinahanglan nga kon mokuha og private towing company, dili maalkanse ang dakbayan sa Sugbo sa pagbahinay sa kita. Kon paspasan lang g’yud ang pag-clamp ug pag-towing sa mga sakyanan nga ipataka lang pag-park sa mga “no stopping area” sigurado nga makatabang ni pagpahapsay sa atong trapiko.

Karon gud, puwerteng abusadoha sa ubang tag-iya og sakyanan kay wala’y kaikog nga sa ilang pag-park daplin sa karsada, makapahasol sila sa ubang motorista. Magpasalamat ko daan ni Mayor Osmeña kon ibalik na niya ang towing.

Sigurado ko nga adunay moreklamo niini, apan kadto ra nga mga tawo nga abusado ug wala’y uwaw nga mogamit sa karsada isip ilang parking area sa sakyanan. Diri lang duol sa Freeman sa V. Gullas Street, kadaghang sakyanan nga anaa ra sa daplin sa karsada gi-park.

Naay tindahan diha nga namaligya og mga itlog, ang ilang trak de karga anaa ra g’yud gi-park sa atubangan sa ilang tindahan. Gawas niana, daghan pa nga sakyanan nga angayang i-clamp aron katudloan og leksiyon ang mga tag-iya.

* * *

Gipasalig usab ni Mayor Osmeña nga tumanon niya ang giawhag ni Presidente Duterte nga hawanan ang aseras aron makatabang kini pag-iban, kon dili man g’yud masulbad ang problema sa trapiko.

Sa ako na nga gibalik-balik sa pag-ingon, kon ang aseras gipangbutangan na og mga kahoy ug unsa pa nga butang, ang mga tawo anha na molakaw sa karsada nga agianan unta sa mga sakyanan.

Kay ang mga drayber mahadlok man nga makadasmag sila og tawo, mopahinay sila sa pagpadagan ug mao nga makaproblema sa trapiko.

 Apan mao lagi, trabaho man unta kini sa PROBE Team sa City Hall apan ‘pakloy’ pa sa nangamatay kining mga tawhana, walay klaro nga trabaho.