Gihurot og baligya sa igsuon ang kabilin

Dear Atty. Divine,

Dunay kabilin nga yuta ang among mga ginikanan. Duha ra mi ka igsuon ug ang akong maguwang maoy nag-occupy niini ug siya maoy nagtikad. Wa namo dayon na-process ang pag-transfer niini ngadto sa among pangalan tungod sa kakuwang sa budget.

Karong bag-o, naka-decide ko nga bayran ang Estate Tax aron hingpit na kini nga mabalhin sa among pangalan, apan nakurat na lang ko kay dihang nagkuha na ko sa Certified True Copy sa titulo kay akong ipa-compute ang Estate Tax sa BIR, nabalhin na man kini sa laing pangalan kay gibaligya man diay kini sa akong igsuon nga wa ko pahibaw-a, ug mi-execute siya og Affidavit of self-adjudication with sale.

Ang akong pangutana, mabawi pa ba nako ang akong share? Unsay angayan nako nga buhaton? Daghang salamat. – Sylvia

Dear Sylvia,

Yes, mahimo pa nimo nga mabawi ang imong share pinaagi sa pagdangop sa korte. Ang Affidavit of Self-Adjudication nga gi-execute sa imong igsuon dili kini valid, or void kini tungod kay dili man tinuod nga sole heir siya, kay aduna man siya’y laing igsuon.

Ang iyang pagbaligya sa property valid lang kutob sa iyang share, apan wa’y labot ang imong share nga katunga sa maong property. Ang maayo nimong buhaton mao ang pagpasaka og kaso sa korte alang sa pag-recover sa possession sa property nga imong bahin ug imo usab nga ipa-nullify sa korte ang Affidavit of Self-adjudication nga gi-execute sa imong igsuon. Thanks and God bless!-Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.