Kinsa ang tinuod

Gipasa ni Mayor Tomas Osmeña ngadto kang Konsehal Joel Garganera ang pasangil nga mao kini ang interesado sa basura nga gikan sa Korea ug gilabay dinhi sa Sugbo. Nagtuo si Osmeña nga si Garganera ang nagpaluyo sa imported nga basura.

Ang pamahayag sa mayor iyang giluwatan human nga adunay tawo nga nagpadala og suwat ngadto kang Presidente Rodrigo Duterte ug namasangil sa suod ni Osmeña nga si Jun Pe ug kanhi Cebu Customs Collector Koko Holganza, ug sa kontak nilang Koreano, nga kuno maoy utok sa paglabay unta og basura gikan sa Korea diha sa Inayawan landfill.

Kon wa pa mo malimot, bisan sa wala pa makalingkod sa katungdanan si Osmeña, ug sa iya na nga paglingkod,  gipangusgan sa mayor ang pag-abli pagbalik sa gisirad-an na unta nga landfill sa Inayawan.

Bisan sa 14 ka kalapasan sa balaod sa kalikupan ug sa kamandoan sa Department of Environment and Natural Resources (DENR) nga pasirad-an ang landfill sa Inayawan, ang mayor nagpabungol-bungol lang ug gipadayon gihapon ang operasyon.

Tungod niini, si Garganera nga kaniadto maoy tsirman sa Committee on Environment sa konseho, mipasaka og kaso sa Court of Appeals ug nangayo og Writ of Kalikasan, ug wala siya pakyasa sa hukmanan.

Ang tawo nga nagpakabana nga misumbong ni Duterte, mitumbok kang Jun Pe nga maoy responsable sa nabulabog nga tinonto. Gipanghimakak hinoon kini ni Pe. Karon, gipasa sa mayor ngadto ni Garganera ang pasangil. Karon, kinsa man ang inyong tuohan? Si Tomas?

Ngano g’yud kaha nga pinangga man kaayo ni Osmeña si Jun Pe? Kinsa man g’yud diay kini siya sa kinabuhi sa mayor? Daghan na nga higala nako nga duwende ang misulti nga mas tuohan pa ni Osmeña si Jun Pe kay sa asawa niini nga si Konsehal Margot Osmeña. Ambot unsa ni katinuod, pero kon tinuod, ambot lang!