Brgy Tubod, Barili, Cebu

“Kining eskina diri mao g’yuy pundohanan sa mga adik ug mamaligyaay og shabu diri sa among barangay, mga wa g’yud sila’y kahadlok. Manghambog pa nga mga bogo kuno ang mga misurender kay dali ra sila nga pangdakpon.”

Brgy Poblacion, Madridejos, Cebu

“Ipabadlong unta sa mga opisyal kining namaligya’g barbecue nga naa ra sa kilid sa karsada kay makahasol kaayo sa mga motorista tungod sa aso. Naa man unta’y merkado para sa mga manindahay pero nganong wala sila didto.”

Brgy Lahug, Cebu City

“Naa’y namaligya’g shabu diri sa Sitio Camagong pero wala man g’yud kini madakpi nga luyo ra man unta kini sa among barangay hall. Asa na man diay ang mga polis diri sa Mabolo ngano nga wala may gihimong aksyon?”

Brgy Jubay, Liloan, Cebu

“Manawagan lang unta ko sa mga opisyal sa barangay ug sa lungsod nga unta kining karsada namo sa eskina paingon sa Sitio Tuburan, ayuhon na unta kay pwerte na gyud nga gubaa tungod sa mga dagkong truck nga magsige’g agi.”

Brgy Jaclupan, Talisay City

”Amo lang ireklamo kining karsada diri, hangtod na g’yud sa Campo 3 kay gihimo na man nga parkinganan sa mga sakyanan. Kinsa may makabadlong niining mga tawhana nga klaro man unta nga kuyaw kaayo kini sa ubang mangaging sakyanan.”

Brgy Inayagan, City Of Naga

“Kining barangay road sa West dapit kay wa g’yud tiwasa pagtrabaho sa contractor, unya naa pa g’yud ang ilang pison gibilin sa karsada. Ang nakaparat kay naa ra gibutang sa agianan paingon sa subdivision nga nakalisud sa pag-agi sa ubang mga sakyanan.”

Brgy  Sangi, Toledo City

“Naunsa na man kining karsada namo diri nga gisigehan ra man og guba, unya wala man g’yud ayoha, abog kaayo. Kanus-a man intawon kini humanon sa pagtrabaho kay dugay na intawon nga nag-antos ang mga tawo diri.”

Brgy San Roque, Talisay City

“Wala g’yud atimana sa mga opisyal namo diri sa barangay ang pundir nga suga sa mga poste diri sa Sitio Sawsawan. Tungod sa kapakyas pagpasiga sa mga suga, misiaw sab ang kinawatay diri kay ngitngit man kaayo.

Brgy Matunag, Balamban, Cebu

“Hangtud kanus-a man intawon kami mag-antos diri sa mga sitio sa among barangay nga apektado niining wa’y linya sa kuryente. Naa’y mga lugar nga may kuryente, pero kadto ra nga mga pinalabi sa among kapitan.”

Brgy Kabutongan, Santander, Cebu

“Kining among lugar, puwerte na g’yud nga daghanang namaligya’g shabu, apil na sa silingan nga mga barangay. Maayo unta’g maaksyonan dayon kini kay imbes nga mahunong misamot na man hinuon kadaghan sa mga adik diri.’

Alang sa inyong mga reklamo text lang sa 09083006702