EDITORYAL – Si Rama g’yud ang tumong

Ang tinguha ni Mayor Tomas Osmeña nga pagbaligya og tulo ka ektareyang yuta sa South Road Properties (SRP), duha ang tumong niini, ang pagtigum og kuwarta para sa dakbayan, ug ang pagpakauwaw ni kanhi mayor Michael Rama.

Bisan og ang panudlanan sa dakbayan pagka karon adunay kapin sa P8 Bilyones nga pundo gikan sa nabayad sa mga investors nga nakapalit sa 45 ka ektaryang kayutaan nga gibaligya ni Rama atol sa iyang pamunoan, apan wala kini gastoa ni Osmeña kay gusto niyang bawion ang yuta.

Ang nag-una nga rason ni Osmeña ngano nga gusto niyang bawion ang nabaligya na nga yuta mao nga ang P16.6 Bilyones nga halin sa dakbayan sa pagbaligya og 45 ka ektaryang kayutaan, barato ra kaayo sa kantidad nga P38 mil matag metro kwadrado.

Nangayo og pagtugot si Osmeña sa City Council, ug gihatagan na siya og pagtugot kaniadtong Martes, aron makabaligya siya og tulo ka ektarya sa kantidad nga P110 mil matag metro kwadrado. Nagtuo ko nga may gikasabot na si Osmeña nga mopalit sa yuta sa mao nga kantidad.

Sa ato pa, kon makabaligya si Osmeña sa yuta nga tupad ra g’yud sa gibaligya ni Rama, unya ang kantidad P110 mil matag metro kwadrado, ang katawhan makaingon gyud nga tinuod ang gibutyag ni Osmeña nga nabentahaan ang dakbayan sa Sugbo sa gihimo ni Rama.

Apan ngano nga nagdugay-dugay man usab ang mga konsehal nga alyado sa Team Rama sa paghatag og pagtugot ni Osmeña nga makabaligya og yuta nga P110 mil ang matag metro kwadrado? Duna ba sila’y gikahadlokan?

Ang nakanindot niini kay kon ang siyudad ubos sa administrasyon ni Osmeña makabaligya og yuta sa SRP sa kantidad nga P110 mil matag metro kwadrado, ingon niini na ang presyo sa sunod nga pagbaligya ug mahimong mosaka pa gani. Sa ato pa kita nga publiko ang makabenepisyo.