Ang sugal aron modaog

Angkunon man ug dili, kita mahilig gayud sa bisan unsa nga sugal. Ilabi na sa sugal nga mopusta la’g pipila ka pesos, unya ang premyo minilyon ka pesos. Tungod niini, nanguhong ang daghang ilegal nga kakompetensiya, pag-engganyo sa pagsugal sa laing mga haylo nga sa pamasin makadaog.

Wala’y maniobra sa nagpasugal nga maalkanse, kon duna ma’y mabangkarota mao kadtong mga mosugal, naadik na nga itahan sa utang aron kapuhonan, nga kon makadaog man, alkanse gihapon sa puhonan, gawas moapil ka nga mosakay sa mga dumadaog. Apan mao lagi, mamuhonan ka’g liniog, hangtud nga mapordoy nga ipamaligya ang gitagana nga alang sa kaugmaon.

Apan ang uban moingon lang, lingaw-lingaw lang ni, sagdi la’g dili kadaog basta makatabang sa katuyoan sa pagsugal nga mao kuno ang pagtabang sa nanginahanglan. Aw OK man sab, kana kon mao g’yuy motibo sa pagsugal. Basta ayaw la’g laum, kay wala kanimo ang kontrol nga purohang modaog ka.

Adunay sugal nga dako kaayo’g kahigayonan nga modaog ka nga mao ang sugal sa kinabuhi, nga gipasiugdahan sa Kahitas-an nga wa’y trampas o panikas. Isugal ang kaugalingon nga puno sa pagtuo nga modaog, nga buhaton ang matinud-anon nga panlimbasog, ang higpit nga pagsunod sa iyang kabubut-on.

Mopuhonan ka’g paningkamot, kon gusto ka modawat og dako nga pagdaog sa kinabuhi. Pasingot la’y ipusta, paghago, determinasyon nga nakatutok sa pag-antos nga mapailubon sa pagsulay nga mao ang sugal sa pagdaog sa kinabuhi. Dili lang kini alang sa kaugalingon mo nga kapuslanan.

Aron mahingpit ka sa pagdaog, kinahanglang mohatag sab ta’g balato nga makatabang sa uban, nga makapahimulos usab sila sa imong kadaogan. Basin og mahanaw na nga bawion sa Ginoo tungod sa atong pagkumkom sa kahakog.