Anak sa langyaw dinhi sa nasud suportahan ba gihapon bisan divorce na?

Dear Atty. Divine,

Duna ko’y pangutana labot sa support sa akong anak. Ang akong bana usa ka foreigner ug duna mi usa ka anak. Diha nga 3-year old na ang bata, miuli ang amahan sa ilang nasud ug wa na mobalik. Wa na sab kini mokontak nako ug dili sab kini motubag sa iyang email.

After 2 years, akong nahibaw-an nga mibalik na kini dinhi sa Cebu ug may lain na nga babaye nga katipon. Wa g’yud kini siya mosuporta sa iyang anak nga karon nagsugod na sa pag-eskuwela sa pre-school.

Unsay angay nako nga buhaton aron iyang suportahan ang iyang anak? Nagduda ko nga nakakuha og divorce sa iyang nasud ang akong bana, ug kon tinuod kini obligado ba gihapon siya pagsuporta sa bata? Daghang salamat. -Tricia

* * *

Dear Tricia,

Ang una nimo nga buhaton mao ang pagpahimo og Demand Letter sa imong abogado alang sa suporta nga imong pangayuon sa amahan sa imong anak. Kon iyang ibaliwala ang imong pagpangayo’g suporta alang sa bata, mahimo nimo siya nga pasakaan og kaso sa korte alang sa imong pangayuon nga suporta.

Puwede sab nga criminal case ang imong ipasaka kay ang iyang pagdumili pagsuporta sa imong anak usa kana ka kalapasan sa Republic Act 9262, kun Anti-Violence Against Women and Their Children Act, ug hayan mapugos g’yud siya sa pag-atubang sa maong kaso, ilabi na kay kini usa ka criminal case.

Apan kon pananglit nakakuha na siya og Divorce Decree sa ilang nasud ug mo-claim siya nga dili na siya obligado pagsuporta sa bata base sa ilang balaod, then angay niyang pamatud-an sa korte ang ilang balaod kay ang iyang National law mao may kinahanglang masunod may labot sa iyang status ug sa iyang family rights and duties.

Kay kon mapakyas siya sa pagmatuod niini, then ikonsiderar sa korte nga ang national law sa imong bana, pareho ra sa atong balaod nga obligado ang amahan sa pagsuporta sa bata bisan kon nagbuwag na sila sa inahan niini. -Atty. Divine