Hulga sa terorismo seryusohon!

Niadtong nakalabay’ng semana gikataho, ilabi na sa social media, ang paglusad kuno og simultaneous attack sa mga terorista sa mga dagkong siyudad sa nasud karong Hunyo 30.

Base sa report, ang mohimo kuno og pagpangatake mao ang mga ISIS, Maute terror group ug Bangsamoro Islamic Freedom Fighters (BIFF). Target matud pa sa mga terorista ang mga dapit nga adunay daghang tawo sama sa simbahan, malls ug uban pa.

Gani, aduna usab kuno’y mga suicide bomber nga moatake. Wala’y confirmation niini ang atong kapolisan. Hinoon, miawhag sila sa katawhan nga magmabinantayon lang kanunay.

Matinuod man o dili ang report, kinahanglan nga kitang tanan magbantay, tungod kay dili na basta-basta ang atong mga kaaway karon, sanglit literal na nga mga sakop sa demonyo nga wala’y giila bisan ang kaugalingon nilang mga kadugo ilang pamatyon.

Ang ingon niini nga kasayuran dili angayan nga ililong sa mga otoridad sa katawhan kay kinabuhi sa matag usa ang nakataya.

Rason nila nga makamugna kuno og kahadlok ang mga balita nga sama niini, pero alang kanako, bahala na og mahadlok basta makapangandam lang.

Tan-awa kon unsa’y nahitabo sa Marawi, tungod sa subra ka kumpiyansa, dili lang sa mga otoridad, lakip na ang mga sibilyan, nahisama na sa usa ka impiyerno karon ang ilang dapit nga giharian sa mga sakop sa yawa.

Kon magkahiusa lang ang tanan sa pagbantay sa naangkon nato nga kahapsay ug kalinaw karon, wala’y si bisan kinsa nga makagun-ob niini.

Napamatud-an na kini sa mga Bol-anon kinsa nagtambayayong uban ang mga tropa sa kagambanan sa hingpit nga pagpukan sa mga Abu Sayyaf.