Ang lawas ni Mayor Gisela

Nagsulti ba sa tinuod ang usa sa mga akusado sa pagpatay kang Mayor Gisela Boniel sa lungsod sa Bien Unido sa lalawigan sa Bohol? Mao kini ang dako nga pangutana karon nunot niining padayon nga pagpangita sa iyang lawas.

Matud pa ni Riolito Boniel, ang ig-agaw ni Bohol Provincial Board Member Niño Rey Boniel, ang bana sa mayor nga maoy nag-unang suspek sa krimen, nga didto kuno nila gilabay ang patay nga lawas sa mayor sa dagat taliwala sa Lapu-Lapu City ug Bohol.

Apan hangtud niining akong pagsulat wala pa’y lawas nga naugkat ang otoridad sa maong dapit. Matag adlaw ang pag-ubog sa tubig sa mga divers pagpangita sa lawas ni Gisela kinsa giingon nga giputos og habol ug gipatabanan og 30 kilos nga bato.

Hinuon sa kalapad sa dagat taliwala sa Caubian Island ug Bohol, lisud gayud ang pagpangita sa lawas sa mayor, ilabi na nga wala’y nasayod sa tukma nga lokasyon niini. Kini tungod usab sa kusog nga sulog sa tubig nga maoy naghatag og kalisud sa mga divers.

Daghan ang nag-ingon nga basin kon naanod na ang patay nga lawas sa mayor tungod sa kakusog sa sulog sa tubig. Gani dunay mga sugyot nga kinahanglan palapdan pa sa otoridad ang pagpangita niini ngadto ubang lugar paingon sa Camotes Islands.

Alang sa prosekusyon, importante gayud nga maugkat ang patay’ng lawas ni Mayor Gisela, bisan kon bukog na lang ang nagpabilin niini. Kini tungod kay dako kini nga ebidensiya alang sa pagpalig-on sa kaso batok niadtong mga akusado.

Apan unsay mahitabo kon dili gayud makit-an ang iyang lawas? Mahuyang kaha ang kaso? Aw mag-agad kana sa dagan sa kaso ug kon aduna ba’y igong basehan ang habig sa prosekusyon pagduot gayud niadtong mga akusado.

Hinuon kon makit-an gayud ang lawas ilalom sa dagat, basin baya kon nagsulti usab sa tinuod si Riolito, ug dako kana nga ikatabang sa prosekusyon. Apan bisan tuod kon makatabang kana og dako sa kaso, kon unsa man ang dagan niini nagdepende kana sa korte.