Dakpon na ang mogamit og cellphone samtang mag-drive
Dear Atty. Divine,
Tinuod ba nga gidili na ang paggamit og cellphone, sama sa pag-text o pagtawag kun ikaw nagmaneho sa sakyanan? Unsa’y silot kun masakpan ta nga migamit sa cellphone samtang nagdrive? Daghang salamat.— Leo
Dear Leo,
Yes, gisugdan na sa LTO sa tibuok nasud ang pagpatuman sa balaod nga nagdili sa paggamit og cellphone samtang nagmaneho sa ilang sakyanan base sa Anti-Distracted Driving Act. Ang maong balaod, nagdili sa paggamit, dili lang sa mga cellphone, kun dili, lakip na ang ubang mga electronic entertainment, communication device ug computing gadget samtang nag-drive sa sakyanan o bisan atol sa temporaryong paghunong niini sa traffic light o sa mga intersection.
Sa ato pa, kun ikaw nagmaneho sa sakyanan, dili na mahimo nga motawag sa cellphone o modawat sa mga tawag og motext, o mobasa sa mga messages ug motan-aw sa mga movies or mo-surf sa internet. Base sa maong balaod, ang makalapas niini adunay multa nga P5 mil sa first offense, P10 mil sa second offense, ug P15 mil sa third offense plus suspension sa driver’s license ug sa fourth offense, P20 mil nga multa plus pag-revoke sa lisensya.
Covered sa maong balaod dili lang ang mga public ug private vehicles, kun dili, lakip na ang wheeled agricultural machineries, construction equipment, bicycles, pedicabs, trolleys, habal-habal, kuligligs, wagons, carriages ug mga cart. Gidili usab sa maong balaod ang pagbutang og mga communication or electronic gadget sa dashboard sa sakyanan o sa steering wheel.
Sa mga pampublikong sakyanan, dili lang ang mga driver ang manubag kun siya makalapas sa balaod, kun dili, lakip na ang mga operators ug owners. Kini aron pagseguro sa kaluwasan sa driver, sa mga sumasakay ug sa mga tawo nga molabang sa kalsada. Hinoon, aduna kini exemption ilabi na panahon sa emergency, crimes, accidents, bomb threat or terror threat, explosion ug uban pa nga nagkinahanglan og medical attention.— Atty. Divine
- Latest