Dili gustong bahinon ang kabilin sa ginikanan

Dear Atty. Divine,

Adunay ancestral home nga gibilin ang among mga ginikanan. Upat mi ka anak ug dugay na nga namatay ang among mga ginikanan. Ang among kamaguwangan nga atua magtrabaho sa US, misugyot nga magpirmahanay mi nga mga igsuon og kasabutan nga dili gyud namo ipa-subdivide ang maong property aron magpabilin kining tibuok kay mao kini ang bugtong handumanan namo sa maong mga ginikanan.

Misugot mi nga mga igsuon kay kaming tanan bukas man nga makagamit sa property, ilabi na kun mobakasyon kami sa among probinsya. Ang akong pangutana, kun wa bay kalapasan sa balaod kun magsabot mi nga mga heirs nga dili namo i-subdivide ang kabilin sa among mga ginikanan? Daghang salamat. — Emee

Dear Emee,

Base sa Article 494 sa New Civil Code, kini nagkanayon: “ No co-owner shall be obliged to remain in the co-ownership. Each co-owner may demand at any time the partition of the thing owned in common, insofar as his share is concerned.” Apan kun adunay kasabutan ang tanang co-owners nga dili nila bahinon ang property sulod sa napulo lang ka tuig, balido kini.

Kining napulo ka tuig nga term mahimo pa nga patas-an o lugwayan pinaagi sa laing kasabutan sa mga co-owner. Busa kamo nga mga co-owner mahimo mo nga mopirma og kasabutan nga dili bahinon ang property sulod sa napulo ka tuig ug kun mapupos na ang maong term, magpirmahanay na sab mo og laing kasabutan alang sa pag-extend niini.

Apan kun moabot na or mapupos na ang term sa maong kasabutan, dili na gyud kamo makapugong sa ubang co-owners kun gusto na nila nga kuhaon ang ilang share ug  mo-demand sila sa pag-subdivide sa property kay ila man kini nga katungod base sa balaod. Thanks and God Bless. -Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.