EDITORYAL - Produkto sa wala’y klaro

Kinahanglang magtarong ang mga lider karon sa nasud, dili lang ang kasamtangang administrasyon, kun dili, hasta ang mga anaa sa oposisyon kun gusto gyud nila nga matunhay ang kaugmaon sa mga Pilipino. Kanang pagkusog karon sa radikalismo ug terorismo sa kabataan karon, mabasol sa pamaagi sa gobiyerno pagdumala sa nasud, sama sa nagkalain-laing mga isyu dili lang ang usa ka problema, kun dili, ang tanan aron dili masaag sa dalan ang kabataan samtang sila nangita pa og kabutangan.

Dako kining hulga sa seguridad sa nasud, butang nga kinahanglang tutokan ug seryusohon ug dili usikan ang panahon tungod sa pamolitika. Ang nahitabo sa Mindanao, mabasol ngadto sa nangaging mga lider sa nasud. Kining kabataan nga nagpasakop sa mga teroristang grupo, produkto kini sa pagpabaya sa gobiyerno. Sama na lang niining Maute terror group nga nanggubot karon sa Marawi City, ang ilang mga ginikanan sakop sa MILF. Ang MILF produkto sa palpak nga Tripoli Agreement tali sa gobiyerno ug sa MNLF tungod sa pagpakamaayong laki sa ubang mga eksperto kunohay sa balaod kaniadto.

Dihang gihulma ang peace agreement sa MILF ug sa gobiyerno, daghang maayong laki nga nibabag ug nisupak kay  nasuhito kuno sila sa balaod, kini miresulta sa pagkatawo na usab sa Bangsamoro Islamic Freedom Fighters (BIFF). Apan samtang nag- lantugi ang mga maayong laki, wala na nila maatiman ang kaugmaon sa kabataan, ilabi na ang anak sa mga rebelde nga sukad pa sa pagkatawo wala na makatarong sa pagtungha tungod sa sige nga gubat.

Karong nanagko na sila, wala gihapo’y kasigurohan ang ilang kinabuhi tungod gihapon sa mga “maayong laki” sa gobiyerno ug bisan sa liderato sa mga rebelde kun unsa ba gyud ang ilang gustong mahitabo sa Mindanao. Kining mga bataa, hinog na kaayo para sa mga terorista aron irekrut. Karon magsige lang gihapon og patas-anay og ihi ang mga anaa sa posisyon.