Kaluwasan sa mga bata

Gipatuman sa Department of Transportation ang Republic Act 10666, kon Children’s Safety on Motorcycle Act of 2015, sugod niadtong Biyernes, Mayo 19. Gitumong kini aron mapanalipdan ang mga gagmay’ng bata gikan sa mga aksidente nga posible nga ilang masugatan sa panahon nga isakay sila sa motorsiklo. Ang lagda mao nga kadtong mga bata nga dili pa kaabot ang tiil sa foot peg, ug ang bukton dili pa usab makagakos sa hawak sa drayber sa motor, dili gyud puwede nga isakay.

Ang drayber nga dili motuman multahan og P3 mil sa first offense, P5 mil sa second offense ug P10 mil sa ikatulo nga paglapas. Pastilan daghan gyud kaayo ang makamulta kun hingusgan ang pagpatuman niining naasoy’ng balaod.

Gani, atol sa unang adlaw sa pagpatuman sa balaod niadtong Biyernes, pwerteng daghana gyud sa nasakpan nga nakalapas sa balaod, ilabi na kadtong gikan ug padulong sa kabukiran.

Sa may Lahug area lang daan, daghan kaayo ko og nasugatan nga nagkugos og bata nga masuso pa, may gibutang sa atubangan ug naa usab sa luyo nga wala pa gyu’y helmet.

Sa paghatud sa mga estudyante sa mga eskwelahan, ang motor ra gyud ang saligan sa uban nga ginikanan. Ang pangutana karon, mapatuman ba sa LTO ang balaod?

Unsa naman lang ang sakyan sa mga tawo didto sa bukid nga habal-habal lang ang madali sa pagsakay? Hinoon ang balaod, balaod gyud nga dili mahimong supakon kay gipanday kini alang sa kaayohan sa kabataan.

Naa man, o wala kining mao nga balaod, kinahanglan nga mosubay kita kun unsa’y husto kay kita ra man sab ang makabenipisyo. Daghan na kaayo og bantayanan karon sa LTO, anaa pa ang Anti-Distracted Driving Act, unya pila ra man ang ilang manpower?

Daghan kaayong balaod nga napanday nga nindot unta kaayo, apan wala gihapo’y kapuslanan kun dili kini mapatuman.