EDITORYAL - Drug test drama

Unsa kaha ang implikasyon, ug unsa kaha ang maangkong kaayohan sa mga lumolupyo sa Dakbayan sa Sugbo niining daw kontes sa pagpa-drug test nila ni Cebu City Mayor Tomas Osmeña ug kanhi mayor Michael Rama. Kaniadtong Biyernes sa buntag, nipatawag og press conference si Rama ug didto iyang gihagit si Osmeña nga magdungan sila pagpa drug test. Misanong usab dayon sa hagit si Osmeña, apan dili sa termino nga gusto sa iyang karibal.

Gusto ni Rama nga iyang pamatud-an “face-to-face” kang Osmeña nga dakong bakak ang mga akusasyon sa mayor nga siya tiggamitan og illegal drugs. Kinahanglan kini kay dili baya malalim ang kauwaw nga nasinati ni Rama ug sa iyang pamilya tungod niining pasangil nga usa siya ka drug user.

Aron klaruhon ug tapuson kining maong mga pasangil, gihagit ni Rama si Osmeña nga silang duha magdungan pagpa drug test. Apan wala mopakita si Osmeña didto sa Plaza Independencia kagahapon kay siya buwag nga nagpa-drug test sa usa ka ospital, samtang si Rama didto nagpa drug test sa usa ka laboratory.

Hinuon, kun buot hunahunaon, si Osmeña dili kinahanglang mosanong kang Rama kay sibilyan na man kini samtang siya naa sa gobiyerno. Tungod ba kaha sa “sabot sa lalaki” nisanong si Osmeña, apan wala niya sunda ang kagustohan ni Rama. Sa laktod nga pagkaestorya, parehong nangatandog ang ilang mga garbo. Kinsa kaha kanila ang mag-positibo sa drug test.

Karon ang pangutana, unsay makuha sa mga Sugboanon niining ilang pasundayag? Wala. Para asa man kaha kini ug unsay makuha nila ni Osmeña ug Rama niini? Ang tubag, naa. Kun negatibo ang resulta sa drug test ni Rama, malimpyohan ang iyang ngalan ug mogawas nga bakakon si Osmeña; samtang kun mapositibo, ma-validate ni Osmeña nga tinuod ang mga pasangil ngadto sa kanhi mayor.