Tahas ni Leni
Ang pamolitika ni Bise Presidente Leni Robredo naumol sa mga panghitabo di sa iyang kabubut-on: Naduso siya sa lokal nga pamolitika tungod sa kamatayon sa iyang bana, si anhing DILG Secretary Jesse Robredo; napugos pag-apil sa nasudnong piniliay dihang nibalibad si Senador Grace Poe nga mahimong running mate ni kanhi DILG Secretary Mar Roxas.
Natudlo siya sa gabinete di tungod sa iyang pagpangaplay ni sa kagustohan ni Presidente Rodrigo Duterte kon dili tungod sa sibaw nga awhag sa nagkalainlaing sektor nga angay’ng hatagan og tukma nga lingkoranan sa gabinete ang ikaduha nga labing taas nga katungdanan sa nasud. Nikanaog si Robredo sa katungdanan human did-i ni Duterte pagtambong sa tigom sa gabinete.
* * *
Sa matag ang-ang sa iyang pamolitika, gipasundayag ni Robredo ang panagana: Nabalaka nga ang iyang pagdagan pagka kongresista isipon nga pagsakay sa lapad nga simpatiya human nihagsa ang ayroplano nga gisakyan sa iyang bana sa kadagatan sa Masbate, hangtod nga nakumbinser nga ang pagdagan mao ray makahiusa sa ilang politikanhong mga alyado;
Nagdumili pagdagan pagka bise presidente, mas una ganing gibalibaran ang sugyot nga mag-senador, tungod sa ka wa niya’y kasinatian ni makinarya ug katigayonan sa paglusad og nasudnong kampanya ug labaw sa tanan nakabuylo nang mas inila ug banggiitan niyang mga kaatbang nga pulos senador, silang Bongbong Marcos, Alan Peter Cayetano, Gringo Honasan ug Sonny Trillanes.
* * *
Sa matag lakang ni Robredo nasihag sab hinuon niyang talagsaong kalig-on ug determinasyon: Maisugong giatubang ang masulub-ong mga adlaw sa pagpangita sa nahanaw niyang bana, malinawong gidawat ang pagtino sa kamatayon ug ligdong nga gipangulohan ang linghod pa niyang mga anak sa yanong pagbangotan.
Giluba niya ang gikaintapang politikanhong dinastiya sa Camarines Sur sa labing unang pagdagan og bisan unsang politikanhong baruganan. Nga wa ra sa kumingking sa iyang pagpukan pinaagi sa nipis nga mayoriya sa anak sa diktador kansang kampanya pagbalik sa Malakanyang nilungtad na og tulo ka dekada human sila gipalayas sa EDSA People Power Revolution.
* * *
Nagdumili si Robredo pagdawat sa liderato sa Liberal Party (LP). Nagdumili siya pagpangu sa nagkatibuwaag nga puwersa sa oposisyon human naglumba ang ilang mga alyado sa pagbalitok ngadto sa bag-ong administrasyon. Nagdumili siya pakigsangka ni Duterte tungod sa pagtuo nga managsama sila nga ganahang moalagad sa mga kabus.
Human palagpota sa gabinete, human nakakita sa way pupanagana nga paggamit sa pamunoan sa tanang puwersa ug paagi, tinarung ug binuang, sa pagpatagam sa mga kaatbang ug pagpabor sa mga alyado ug human sa abundang mga ebidensiya nga ang pagtinarung di garantiya nga magpabilin sa katungdanan, mahimong mas andam na si Robredo pagdawat sa wa niya pangayoa nga mas mahinungdanong tahas: Ang pagpangu sa katawhan taliwa sa nasudnong kahadlok ug kalibog.
* * *
- Latest
