Garbo sa Sugbo

Dakong dungog na usab sa Sugbo ang pagkapili sa Sinulog isip nag-una nga festival sa nasud. Ug makapaabot kita og engrande na usab nga edisyon sa maong kalihokan sa Enero isip pagpakita nga sarang gayud dumogon ang tinuig nga festival.

Sa niaging semana, migawas nga mananaug ang Sinulog atol sa Choose Philippines  Awards nga gipahigayon sa Dolphy's Theatre sa ABS-CBN Compound didto sa kaulohan. Matud pa sa mga tagdumala sa maong award, ang Sinulog maoy labing exciting ug dili malimtan nga festival sa nasud.

Gawas sa Sinulog, nominado usab  sa maong award ang MassKara Festival, Panagbenga Festival, Pahiyas Festival ug Kadayawan Festival. Kining maong mga kalihokan naila na usab nga nag-promote sa kulturang Pilipinhon sa tibuok kalibotan.

Hinuon, dili na ikatingala pa nga mosidlak gayud ang Sinulog isip nag-unang festival a Pilipinas. Sukad pa man sa una, motultol na gayud ang liboan ka debotos sa Santo Niño ug mga turista sa Sugbo matag ikatulo ka Domingo sa Enero.

Gani, hagbay rang gibansagan ang Sinulog isip mother of all festivals sa nasud sa Department of Tourism gumikan lagi sa kadako sa maong kalihokan. Kini tungod usab sa kadaghan sa mga bisita, lokal man o langyaw, nga mosaksi niining labing dako nga relihiyosong selebrasyon sa dakbayan sa Sugbo.

Apan tungod sa ka dako sa maong festival, nagkinahanglan usab og mga regulasyon ang pagpahigayon niini. Kini aron nga mamintenar ang kahusay ug kalinaw niini ug layo sa kayagaw nga maoy hinungdan usab sa kagubot.

Uyon ko sa lakang ni Mayor Tomas Osmeña kinsa gusto nga higpitan ang maong festival pinaagi sa pag-ban sa mga ilimnon nga makahubog sa parade route. Kini aron kuno paglikay sa pagtumaw unya sa kagubot dala niadtong mga hubog.

Dako tuod nga garbo dili lamang sa dakbayan sa Sugbo kon dili sa tibuok lalawigan kining maong kadungganan. Hinaut nga magsilbi kini nga pabilo aron nga molambo pa ang Sinulog isip nag-unang atraksiyon sa turismo sa atong lugar.