Kalibog ni Bato
Pipila ka oras human siya nipakugang sa katawhan pinaagi sa pagdeklarar og nasudnong terror alert level 3 (pasabot nga may nag-ung-ong nga seryusong pagpangatake sa mga terorista sa tibuok Pilipinas apil na sa Sugbo ug Kabisay-an) si PNP Director General Ronald “Bato” Dela Rosa nangayo og pasaylo nga nalutsan ang ilang checkpoints sa Metro Manila sa suspetsadong mga terorista nga nisuway pagbomba sa Luneta ug US Embassy.
Dayon, gihubo niya ang iyang uniporme; nagsul-ob og puwa nga kapa, baga nga bungot nga puti ug lingin nga antipara; ug nisabak og mga bata sa pagsugod sa tibuok buwan nga kasaulogan sa Pasko sa higanteng shopping mall sa kaulohan.
* * *
Ang kalit nga pagkausab sa bayhon sa labing taas nga opisyal sa kapolisan, nga tungod sa kahimsog sa lawas ug tiyan angayan kaayong mahimong Santa Claus, nisukwahi sa iyang giawhag nga mas taas nga ang-ang sa pagbantay ug pagpangandam;
Mahimo hinuong isipon nga mensahe nga ang mas seryusong hulga sa mga terorista dili makapugong sa pagpangandam sa Pasko ug ubang naandang kalihokan sa pagsugod sa Disyembre; apan ang kalinga ni Dela Rosa sa pagtambong sa nagkalainlaing kalihokan mahimong makapatin-aw nganong nakasulod sa Metro Manila ang mga dinakpan nga sila si Rayson Kilala Sakdal, alyas Rashid Kilala, ug Jamir Kinar, nga iyang gipasanginlang mga sakop sa Maute group nga gilambigit ni Presidente Duterte sa ISIS.
* * *
Ang pasiunang kalibog nga namugna sa nagkasungi nga mga mensahe ni Dela Rosa, nahingpit sa pagpanghimakak ni National Security Adviser Hermogenes Esperon Jr., nga mas taas og kasinatian ni Dela Rosa kay nahimo man siya nga hepe sa Armadong Kusog sa pamunoan ni kanhi Presidente Gloria Macapagal-Arroyo, sa iyang pasidaan nga ang tibuok nasud na karon maoy nahulga sa mga terorista.
Matud ni Esperon, tulo ra ka probinsiya ang nahulga sa Maute group: Ang Davao, Cotabato ug Zamboanga. Nipasabot si Esperon nga bisan sa nakit-an nga bomba duol sa US Embassy, wa pa sila’y nakit-an nga sukaranan nga ipaubos ang Metro Manila sa terror alert.
* * *
Wa’y makakuwestiyon sa katakus ni Dela Rosa pagpatuman sa gubat ni Duterte batok sa ilegal nga drugas: Kapin na sa lima ka libo ka gipasanginlang durugista ang nangamatay sa niaging lima ka buwan, nabungkag niya ang Espinosa Drug Group sa Eastern Visayas, nadakpan si Kerwin Espinosa sa Abu Dhabi ug nasikop si Ronnie Dayan sa La Union.
Apan wa pa’y nakasohan sa mga heneral, politiko ug dagkong negosyante nga gipasanginlan ni Duterte nga mga protektor sa ilegal nga drugas. Paghilak ug pagpasidaan ra ang nahimo niya batok sa mga polis nga gidudahang tua kapusta sa pikas. Duna na hinuo’y mascot ug gihulagway ni Duterte nga mao ra ang makalabaw sa iyang hambog.
- Latest
