Tigpunit sa hugaw

Nahimong tigpunit sa iyang hugaw ang mga sakop sa gabinete ni Presidente Rodrigo Duterte. Labing uwahi nilang problema mao ang deklarasyon ni Duterte sa Hanoi, Vietnam, nga klarong gihimo sa wa’y pagkonsulta nila, nga tapuson na niyang joint military exercises sa Pilipinas ug Estados Unidos aron nga dili na masuko ang China.

Gitataw ni Duterte nga ang gitakdang usa ka semana nga ship-to-shore maneuver nga salmotan sa mga barkong panggubat ug kaliboan ka Pilipinhon ug Amerikanhong mga sundawo karong buwana, nga iya lang gitugotan aron nga dili mauwawan si Defense Secretary Delfin Lorenzana nga nahinayak na pakigsabot sa iyang mga katugbang sa US Defense Department, apan mao na kini ang kataposan sa iyang unom ka tuig nga termino.

* * *

Makaluluoy ang duha ka sakop sa gabinete nga nagkapuliki sa pagbakwi sa pamahayag ni Duterte.

Si Foreign Affairs Secretary Perfecto Yasay napugos sa pagpa-goryo-goryo pinaagi sa pagbalibad nga naggawas-gawas siya sa venue maong wa kabati sa bahin sa diskurso ni Duterte atubangan sa Filipino community sa Vietnam mahitungod sa joint military exercises; ug

Si National Security Adviser Hermogenes Esperon namalibad nga wa siya kaklaro unsa gyud ang gisulti ni Presidente Duterte apan ang iyang nasabtan mao nga ang joint military exercise nga ipahigayon karong Oktubre 4 ngadto sa 12 nga himuon sa Luzon ug Palawan mao na lay kataposan karong tuiga.

* * *

Nisamot sa pagpanlipaghong sa kauwaw sila si Yasay ug Esperon kay, bisan sa dalidali nila nga katin-awan, gisubli ni Duterte ang iyang deklarasyon pagtapos sa joint military exercises sa Pilipinas ug Estados Unidos pagtugpa niya sa Davao International Airport gikan sa Hanoi gahapon sa kadlawon.

Nipasabot si Duterte nga dili siya gusto nga masuko ang China ug nga modako ang kahigayonan nga moulbo ang mas grabeng kaguliyang sa Spratlys kay mahimong masugamak sa gubat ang Palawan ug ang mga sundawong Pilipinhon.

Gitataw hinuon ni Duterte nga dili niya putlon ang 70-anyos na nga Mutual Defense Treaty sa Pilipinas ug Estados Unidos apan palambuon lang ang relasyon sa ubang kanasuran sama sa Russia ug China.

* * *

Mas apiki si Yasay, kinsa nahinayak na sa pagpahibawo sa langyaw’ng media nga mahinayon ang tanang joint military exercises sa Pilipinas ug Estados Unidos nga natakda na hangtod sa sunod tuig, 2017, ug nga ang deklarasyon ni Duterte nagpasabot lang nga sabutsabotan pa kun madayon ba ang mosunod nga joint military exercises sa 2018.

Wa pay opisyal nga komunikasyon nga nadawat ang Estados Unidos. Magpabilin ang kalibog kinsay nagsulti sa tinuod, si Duterte ba o si Yasay. Kun moinsistir si Duterte sa iyang deklarasyon, mawagtang ang bisan unsang nahibiling kaligdong ni Yasay.

Mahimo sab nga sama sa iyang gibakwi nga hulga paggawas sa United Nations, igo lang moingon si Duterte nga nagpasiaw ra siya. ([email protected])