Gikawat ang motor nga inutang

Dear Atty. Divine,

Duna koy pangutana labot sa motor nga akong giutang. Nag-down ko og kapin sa P40 mil ug nag-monthly ko og P3 mil.

Niadtong miaging semana  gikawat ang motor nga akong gi-parking gawas sa tindahan sa akong igsuon.

Ako na kining gipa-blotter ug ako na sab nga gipahibawo ang dealer nga akong giutangan. Apan matud pa sa ilang empleyado nga kinahanglan gyud ko nga mobayad sa kuwang bisan kun gikawat ang akong motor.

Tinuod ba gud attorney nga makabayad gihapon ko bisan og gikawat man ang motor? Unsa may maayo nako nga buhaton? Daghang salamat.  — Leo

Dear Leo,

Kun adunay insurance ang imong motor ang insurance na ang mobayad niini kana kun comprehensive ang imong insurance nga naglakip sa carnap or kawat.

Busa mas maayo nga imong tan-awon ang imong insurance coverage. Apan kun wa kini malakip sa imong insurance, then mapugos gyud ka og bayad sa balance niini kay imo baya na nga responsibilidad kay naa gud nimo ang butang nga imong giutang.

Mas maayo nga makig-estorya ka sa imong giutangan ug hangyoa lang kun pila ang makaya nimo nga monthly sa kuwang. Thanks and God bless! - Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column mata’g Miyerkules, Sabado ug Domingo.