Story teller!

Nagmalampuson ang kasaulogan sa Cebu Press Freedom Week nga gipangulohan sa The Freeman nga maoy convenor karong tuiga.

Hamubo ra man ang usa ka semana nga pagsaulog apan daghan ang nahimo nga kalihukan pagpalambo sa pakigsandurot sa mga sakop sa prensa ug pagtuki sa mga dagko nga isyu nga adunay kalambigitan sa paghatod sa tukma nga inpormasyon sa katawhan.

Usa sa mga kalihukan, ang Globe Media Excellence Awards, diin gihatagan og pasidungog ang pipila ka mga sakop sa media nunot sa lawom nga pagtuki sa mga estorya.

Usa sa mga napili, mao ang estorya bahin sa "Krisis sa Tubig" isip Investigative Story of the Year for TV category. Nagtagik kini sa estorya sa mga tawo nga naapektohan sa nasinati nga huwaw mugna sa El Niño phenomenon niadtong nakalabay nga mga bulan.

Nahubas ang tinubdan sa tubig sa Buhisan ug Jaclupan dam, lakip na ang ground water source, nga maoy naghatag og kalbaryo sa mga tawo. Nakita dinhi kun unsa ka mahinungdanon ang matag tulo sa tubig nga maghatag og kinabuhi.

Ang pasidungog dili alang kanako, kun dili, alang sa mga tawo sa akong estorya. Isip tigbalita, nahimo lang akong tulay sa sugilanon sa mga tawo. Mas gusto nako nga tawgon og "story teller" tungod kay mas maabot nako dili lang ang hunahuna, kun dili, mismo ang kasingkasing sa mga naminaw sa akong estorya.

Sama sa usa ka bata nga mopilit gyud sa pagpaminaw sa story telling session sa iyang amahan o inahan. Kun gamiton nato kini nga pamaagi sa atong bokasyon sa media, mas mapasabot nato ang mga tawo. Ang paghimo sa estorya, sama sa pagluto og tinola nga manok bisaya nga aron molami, kinahanglang kompleto dili lang sa lamas, kun dili, ang manok mismo nga maoy bida sa putahe.

Ang mga tawo ug ang mabulokon nilang sugilanon mao ang makapalami sa estorya nga atong ibayang sa talad estoryahan. Gitisok nako sa akong alimpatakan nga ang story teller dili ang bida, kun dili, mismo ang estorya.