Change has come

Indeed, miabot ra gyud ang gisaad ug gipangandoy nga change, ug ang unang change nga mi-come mao ang change sa mga political parties. Mao kini ang nahitabo sa Kongreso, kay alang nila dili sila makaalagad sa lungsod, kun dili, mag-ilis og partido.

Dinhi sa ato, nagsugod na usab ang change. Usa kini ka political necessity, kay ang atong mga piniling opisyal dili maka-support sa mga programa sa incumbent president, kun dili, mobalitok og partido.

Normal na kini nga talan-awon ug mao na kini ang atong naandan sa natad sa politika sa atong nasud. Ang giingon nga political discipline, political loyalty ug political ideologies and platforms, wa na ni, passé, na, obsolete na, bahaw na, kinaraan na. To hell with political parties.

* * *

By the way, sukwahi sa naandan, kining gibuhat ni Konsehal Dave Tumulak, lisud ug talagsaon, kay samtang nangambak na ang iyang mga kauban ngadto sa party in power, lain ang iyang giambakan.

Milayat siya gikan sa mayoriya nga mga sakop sa konseho sa dakbayan… aron mag-independente kay gikapoy na siya sa masubsob nga pamolitika sa dakbayan, bisan kun tapus na ang eleksyon; nga unta ang ilang focus karon, mao na unta ang pag-alagad, regardless sa bulok sa politika.

Apan karon, mao ra man og sige lang gihapon ang kampanya. Sige lang gihapon og dinautay, linabayay og lapok … ug kinihaay.

Mao nga masabtan nato ang gibati ni Tumulak nga atong maisip nga dili traditional politician, ug atong tahuron, atong respitohan ang iyang desisyon. Dili lalim kining iyang gibuhat. Dili sayon. Usa siya sa mga pinangga unta ni kanhi Mayor Mike Rama.

Lagmit conviction maoy nakaaghat kaniya pagbiya sa iyang partido. Sa atong pagsulat niini, wala pay katinoan kun mabalitok ba siya paingon sa BOPK.

Unique man gud ning politika sa atong dakbayan. In most instances, wala kita  mag-agad ug wala magsalig sa nasyonal nga kahimtang politikanhon. Dinhi sa ato, it’s either BO-PK or TEAM RAMA ka, regardless unsa nga mga political parties sa kaulohan ang gisabak sa lokal nga mga partido.

Ug kita dinhi sa Sugbo, konsiyensiya maoy basehan sa atong pagbotar, dili pinasikad sa partido, ug dili base sa liderato sa mga barangay. Maoy hinungdan nga bisan kun imo ang tanang kapitan sa barangay, dili kini maghatag og assurance sa imong kadaugan.

Suma, midaog si Presidente Duterte, dili gumikan sa partido, kun dili, gumikan sa isyu ug konsiyensiya sa katawhan.