Grasya sa pagsabot sa kamatayon

Ang kamatayon anaa gyud kanunay ug bisan unsaon adto gyud ta padulong. Apan ang tanan bisan pa man dili hingpit dunay kahulogan ug dunay tumong. Walay mabuhi nga way kapaingnan gawas kun ugaling pilion sa hingtungdan nga mopanaw sa kinabuhing way kapaingnan. Sa akong pagsud-ong sa lungon sa edarang lalaki nakita ko ang kamahinungdanon sa karon. Ang tukmang panahon sa pagbinuotan mao man ang karon ug ang tukmang panahon sa pagtinarong o pagbuhat og maayo mao man karon. Dili ugma o sa sunod adlaw kay ang kamatayon lisud sabton ug moabot sa panahon o higayon nga di nimo paabuton.