Tungod ug alang sa grupo

Wala maapil si kanhi mayor Mike Rama sa oathtaking sa mga lokal nga opisyal sa Sugbo isip mga bag-ong miyembro sa PDP-Laban, ang partido sa administrasyon.

Ang rason niini mao ang pag-apil sa iyang ngalan sa listahan ni Presidente Rodrigo Duterte sa mga mayor ug kanhi mayor nga giingong protektor og mga druglord.

Nakadawat ko og hungihong nga mamugos unta ang mayor sa pag-apil sa oathtaking, apan mismo ang iyang mga kauban sa Team Rama ang mitambag kaniya sa paglimpyo una sa iyang ngalan human gihinganlan nga protektor og druglord, una siya manumpa sa PDP-Laban.

Dili angay ipamugos ni Mike iyang kaugalingon nga mo-uban sa iyang mga konsehal pagtapon sa PDP-Laban gikan sa United Nationalist Alliance ni kanhi bise presidente Jejomar Binay.

Kun didto pa si Mike, mahimo kini nga kataw-anan, ug mahimo kini nga materyal alang sa PR ni Mayor Tomas Osmeña batok sa PDP-Laban.

Maayong mahinumdom kita nga si Tomas loyal nga alyado ni Mar Roxas sa Liberal Party.

Pananglit gitugotan o mamugos si Mike sa pagpanumpa sa PDP-Laban bisan sa mga isyu batok kaniya, mahimong sentro sa atake ang administrasyon ni Duterte nga midawat ug nagpapanumpa og gipasanginlang protektor og druglord.

Ang pagkumbinser sa mga konsehal sa Team Rama sa dili pagpa-apil kang Mike sa oathtaking tungod ug alang sa iyang grupo nga dili maguba bisan sa pasangil batok sa kanhi mayor.

* * *

Motuo mo nga magpabiling independente si Konsehal Dave Tumulak human siya mikalas gikan sa Team Rama?

Si Dave migawas sa Team Rama human siya makig-estorya sa mga Osmeña. Busa magduda gyud ang mga tawo nga paingon na kining motapon sa Bando Osmeña Pundok Kauswagan.

Dili makapugos ang mga kauban ni Dave sa Team Rama nga magpabilin siya sa ilang grupo human maapil ang ngalan sa ilang amahan sa grupo nga si Mike sa listahan sa mga mayor ug kanhi  mayor nga giingong protektor og druglord.

Angay respetohan si Dave sa iyang desisyon, bisan nahimo na nga kuwestiyonable ang iyang kredibilidad tungod sa huyang niyang baruganan alang sa iyang grupo.

Hinaot magmalipayon si Dave sa BOPK.

* * *   

Wala ba kamo kuyawi sa mga nanghitabo sa kinabuhi ni Senador Leila de Lima?

Sayo sa miaging semana gipasanginlan si de Lima nga adunay relasyon sa iyang drayber. Ug kining maong imoral nga relasyon maoy nakaingon nga nakakonek si de Lima sa mga druglord sa National Bilibid Prison.

Ning semanaha, lain nga balita ang mitumaw - si de Lima adunay relasyon sa usa sa iyang mga staff.

Katuohoan ba ang mga pasangil batok kang de Lima?

Tingale. Ang Malacañang ug si Presidente Rodrigo Duterte na mismo ang nangunay sa pag-expose sa mga imoral nga relasyon ni de Lima nga matud pa nakakonektar sa mga druglord sa National Bilibid Prison.