Kakugi sa pag-Google

Kun nidangop pa lang unta sa Google si Kongresista Joel Mayo Almario sa Davao Oriental sa wa pa mangutana ni Ombudsman Conchita Carpio-Morales, di unta siya mauwawan kay matultolan unta siya sa Google sa tukmang mga tubag sa iyang mga pangutana.

Gawas pa, dili unta mausik ang panahon sa Kongreso nga nagsubli sa gisugyot nga budget sa Ombudsman ug ubang mga buhatan sa sunod tuig.

Kun nisuwat pa lang sa browser og “define ombudsman,” mapahibawo unta siya sa Google: “om·buds·man 'ämb?dzm?n/[noun] an official appointed to investigate individuals' complaints against maladministration, especially that of public authorities.” Kun ni-type og “ombudsman etymology,” mabasahan unta nga: “om·buds·man Origin 1950s: from Swedish, legal representative.”

* * *

Labihan kamatinabangon ang Google nga kasagaran siya pay mosugyot unsay ganahan nimong mahibaw-an mahitungod sa buhatan sa Ombudsman. Kun mo-type ka og “ombudsman philippines” sa browser, makakita ka og dropdown sa search predictions. Usa nila ang “list Ombudsman Philippines.”

Nga kun i-click mohatag sa lista sa mga Ombudsman sa Pilipinas: Conrado M. Vasquez, 1988-1995; Aniano A. Desierto, 1995-2002; Simeon V. Marcelo, 2002-2005; Merceditas N. Gutierrez, 2005-2011; ug Morales, 2011-hangtod karon. Nilang lima, silang Vasquez ug Desierto ray nakatiwas sa ilang termino. Si Marcelo ni-resign human sa tulo ka tuig human giapiki sa pamunoan ni kanhi Presidente Gloria Macapagal-Arroyo ug si Gutierrez nipahawa human sa unom ka tuig tungod sa hulga sa impeachment.

* * *

Sa ato pa, mapupos nang termino ni Morales karong Hulyo 2018, o dul-an sa duha ka tuig gikan karon. Kun i-Google ang “term of office ombudsman philippines,” pahibaw-on ka nga pito ka tuig ang ilang paghupot sa katungdanan nga dili mahimong lugwayan ni itudlo pagbalik.

Kun i-click ang “ombudsman philippines office,” tultolan ka sa Google sa buhatan sa Ombudsman nga labing duol nimo, sa akong kaso ang Ombudsman Visayas uban ang mapa sa kanhi compound sa Department of Agriculture (DA 7) , hulagway sa buhatan, zip code (6000) ug numero sa telepono (032-255 0976).

* * *

Kun i-Google ang “salary ombudsman philippines,” pahibaw-on ka nga kun hingpit nang mapatuman ang dakong uminto sa suholan sa tanang kawani ug opisyal sa gobiyerno unya sa 2019, makadawat ang Ombudsman og dul-an sa P300,000 ang buwan. Apan dili makapahimus niini si Morales, kun dili, ang bag-o nang Ombudsman nga mopuli niya. Si Presidente Rodrigo Duterte ang labing dako og uminto, makadawat og dul-an P400,000 ang buwan tulo ka tuig gikan karon.

Managsama og suholan ang Ombudsman sa mga senador ug kongresista nga napili niadtong Mayo 9, sa bag-ong natudlong mga sakop sa gabinete, sa sunod nga presiding justices sa Court of Appeals (CA) ug Sandiganbayan ug sa sunod nga presidente sa University of the Philippines (UP). ([email protected])