Milapas sa yuta sa silingan

Dear Atty. Divine,

Aduna ko’y problema labot sa utlanan sa among gipuy-an. Ang ako man gud nga silingan nagpa-renovate sa iyang balay ug iya kining gipadak-an. Karon akong nasuta nga milapas na siya sa iyang boundary ug nakakuha na siya og pipila ka square meters sa akong luna. Ako na siya nga gipahibawo kalabot niini apan wa man lang ko niya tagda. Gusto unta nako siya nga ireklamo sa barangay apan uyoan man sab niya ang kapitan sa among barangay. Gusto unta nako nga moderetso na lang pagpasaka og kaso batok kaniya ngadto sa korte. Ang akong pangutana, mahimo ba nako siya nga ikiha og dili na lang ko moagi pa sa barangay? Daghang salamat. — Jessa

Dear Jessa,

Tanang dispute o problema, moagi gyud na sa barangay, ilabi na kanang imong problema labot sa boundary. Kinahanglan gyud ka nga moagi og barangay conciliation una ka mopasaka og kaso ngadto sa korte base sa Section 1 (j), Rule 16, 1997 Rules of Court) ug sa Section 412 of Republic Act (RA) 7160, nga nagkanayon: “no complaint, petition, action or proceeding involving any matter within the authority of the Lupon shall be filed or instituted directly in court or any other government office for adjudication, unless there has been a confrontation between the parties before the Lupon chairman or the Pangkat, and that no conciliation or settlement has been reached as certified by the Lupon secretary or pangkat secretary as attested to by the Lupon or Pangkat chairman or unless the settlement has been repudiated by the parties thereto.” Buot ipasabot, nga modangop lang ka sa korte kun dili gyud mo maareglo sa barangay. Ang maayo nimong buhaton karon mao ang pagtuman sa proseso, mopasaka ka og reklamo ngadto sa barangay bisan tuod kun paryente sa imong gireklamo ang kapitan. Kun di mo maareglo sa barangay, then mangayo ka og Certification aron adto na nimo iduso sa korte ang imong reklamo. Thanks and God Bless. - Atty. Divine