Kaligdong mao ang makaluwas ni De Lima

Hait man og dila si Senador Leila de Lima sa mga pulong nga iyang gipanglitok isip kritiko sa Duterte administration, apan dili kini makapadulot sa mas gahi ug hait pa nga kuko sa pangulo nga inanay nga mikunis-kunis sa babayeng senador.

Gani gisugdan na sa presidente ang gibahad niyang "killing me softly" batok ni De Lima pinaagi sa paghingalan niini nga immoral kay kuno nakiglambigit kini sa iyang driver nga giingong giregalohan sa senador og white house.

Adunay nisimpatiya sa lady senator nga nipadayag nga “foul” kaayo ang gihimo sa presidente sanglit personal na ang pagpangatake, ilabi na sa kinabuhi ni De Lima.

Apan ang tumong sa presidente mao nga maestablisar ang koneksyon sa giingong driver lover ngadto sa mga drug lords sa New Bilibid Prisons kay mao kini ang giingong “bag man” sa kuwarta.

Nahitabo kini diha nga si De Lima pa ang Justice Secretary. Kinsa man ang amo sa driver nga mabulahan sa iyang koleksyon kun tinuod man ang akusasyon?

Alang kang De Lima nga usa na ka character assassination ug pag-abuso sa gahum ang gihimo ni Presidente Duterte. Apan dili kini makadulot sa senador kun limpyo lang siya sa mga alegasyon batok kaniya.

Ang kaligdong maoy bugtong hinagiban nga magamit ni De Lima sa iyang pakiggubat batok sa presidente. Apan kun wala siya niini, segurado gyud nga mahitabo ang iyang gipamulong nga moluwat sa katungdanan ug magpapusil atubangan sa presidente.

Be careful of what you wish for!