Gustong ipa-inherit sa apo ang balay ug yuta
Dear Atty. Divine,
Aduna ko’y apo nga anaa nako nagdako kay illegitimate child kini sa akong anak. Ako ang nagpa-eskuwela sa bata ug karon anaa na siya sa koleheyo. Mao sab kini karon ang nag-atiman nako, ilabi na kun masakit ko, kay ang akong anak nga maoy amahan niining bataa aduna na may laing pamilya.
Ang ako sab nga kamaguwangang anak atua na magpuyo sa Amerika. Samtang ang akong bana namatay na niadtong miaging tuig. Gusto unta nako nga ipa-inherit sa akong apo kining akong gipuy-an nga balay ug yuta kay dinhi man siya nagdako.
Unsa may akong buhaton aron pagseguro nga mapunta niining akong apo kining akong gipuy-an? Daghang salamat. - Mrs. C
* * *
Dear Mrs. C,
Base sa atong New Civil Code, ang illegitimate nga anak dili maka-inherit sa intestate estate sa mga legitimate parents and relatives sa ilang mama or papa ug vice versa. Kana maoy nalatid sa Article 992 nga nagkanayon: “An illegitimate child has no right to inherit ab intestato from the legitimate children and relatives of his father or mother; nor shall such children or relative inherit in the same manner from the illegitimate child.”
Buot ipasabot nga tungod kay illegitimate man ang imong apo dili siya maka-inherit sa imong kabtangan apan mahimo siya nga himoon nimong beneficiary or heirs sa imong Last Will and Testament.
Ang maayo nimong buhaton aron pagseguro nga mapunta gyud sa imong apo ang imong balay ug yuta mao ang paghimo og Last Will and Testament. Apan kinahanglan nga gawas sa imong balay ug yuta nga ihatag nimo sa imong apo, may lain ka pa nga properties nga ibilin nimo sa imong duha ka anak nga maoy imong mga compulsory heirs kay base sa balaod dili mahimong mahikawan sa ilang bahin ang mga compulsory heirs.
Buot ipasabot nga dili mahimong ihurot nimo og hatag sa imong apo ang balay ug yuta kun wa na’y ma-inherit ang imong duha ka anak kay moresulta kini sa pagka-invalid sa imong Last Will and Testament. Thanks and God Bless! - Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
