Wala kaandam ang kagamhanan

Taliwala niining pagsurender sa mga giingong mga tiggamitan og ginadiling druga, dakong problema karon sa kagamhanan tungod kay nagkulang ang nasud sa mga rehabilitation centers pag-accommodate sa liboan ka mga drug users kinsa mitahan ngadto sa otoridad.

Klaro nga wala kini mapangandami sa gobiyerno, ilabina na sa Department of Health. Ug nagkapuliki karon ang mga opisyal niini pagpangita og remedy asa ibutang kining mga drug users alang sa ilang rehabilitasyon aron nga dili na sila mobalik sa ilang bisyo.

Apan sa liboan nga misurender, dili tanan ang gusto og rehabilitasyon. Adunay daghan usab ang mitahan sa ilang kaugalingon tungod lagi kay nahadlok nga matiklo sa otoridad sa gihingusgang kampanya sa kagamhanan batok sa negosyo sa ginadiling druga.

Mao nang human mipirma og kasulatan atubangan sa kapolisan pagsaad nga mopalayo na gikan sa druga, daghan sa mga pusher ang namalik sa naandang bisyo tungod kay wala na man usab silay bag-o nga kapanginabuhian alang sa ilang mga pamilya.

Hinuon adunay mga private nga organisasyon nga mitabang karon sa kagamhanan alang sa rehabilitasyon sa mga drug addict ug paghatag og alternative livelihood alang niadtong mga pushers. Apan limitado lamang ang ilang mga resources alang niining dakong misyon.

Sa wala pa ang Oplan Tokhang sa kapolisan, aduna na untay insaktong mga programa nga giandam ang gobiyerno. Kini aron nga matutokan gayud sa mga concerned agencies kadtong mga buot nga mosurender.

Apan karon nagyagaw na hinuon ang sistema. Kini tungod kay walay insaktong rehabilitation centers alang niadtong liboan nga mitahan sa tibuok nasud. Tungod kay dili ma-accommodate tanan, daghan na hinuon ang namalik sa bisyo sa ilegal nga druga.

Hinaut nga sa national budget alang sa sunod tuig, dakong gahin ang itunol sa kagamhanan ngadto sa mga departamento sa health ug sa social welfare and development. Kini aron nga ilang masagop ang tanang mosurender kinsa gusto na nga magbag-o sa ilang kinabuhi.