Mr. Barangay
Brgy Calamba, Cebu City
"Naunsa na man ang A Lopez Sir nga wala man gihapon mapuhag ang kalihukan sa ilegal nga drugas nga daghan na man unta ang misurender pero diri sa among lugar daghan pa man ang namaligya’g shabu. Tinuod kaha ang gisulti ni Duterte nga sulbaron niya’g 6-months ang illegal drugs?”
Brgy Uno, Tuburan, Cebu
“Kinsa may mayor sa among lungsod Sir nga wala man gyud masulbad ang problema sa kabati sa karsada. Dugay nami sige’g inantos sa pag-agi sa mga gubaon nga karsada pero wala mi kabantay nga naay gihimo among mayor pagsulbad sa maong problema.“
Brgy Sibugay, Cebu City
“Manghinaot unta ko nga maaksyonan na ang mga problema sa among barangay bahin sa mga ilegal nga kalihukan sama sa sugal ug ilegal nga drugas. Murag wa magsilbi diri sa among dapit ang TUKHANG kay wala man misurender ang mga banggiitan nga tigpayuhot sa ilegal nga drugas.”
Brgy Talavera, Toledo City
“Naa lang unta mi ireklamo bahin sa mga batan-on kay mamato man sa mangagi nga mga sakyanan ug mga tawo labi na sa lawom nang gabii. Maayo unta’g naay curfew nga ipatuman diri sa among lugar batok sa mga batan-on aron masumpo na ang nahitabong krimen ug kagubot diri.”
Brgy Lorega-San Miguel, Cebu City
“Amo lang ipahibawo nimo sir ang kabahin sa tubo sa MCWD nga naguba kay gi-backhoe ang likod sa among balay diri sa Sitio Lumar. Luoy kaayo mi kay ang tubig misulod sa among balay unya gitawagan namo ang taga MCWD wala man gyud moari diri.”
Brgy Nasingin, Getafe, Bohol
“Wala man molihok si Duterte diri sa among barangay kay hangtod karon daghan pa man gihapon ang namaligya ug nigamit sa aso sa demonyo. Unsaon man pagkatuman sa bahad sa bag-ong presidente kun dili molihok ang mga polis ug taga barangay.”
Brgy Baring, Carmen, Cebu
“Kining among barangay labi na sa Sitio Obayon 1 kay layo kaayo sa lungsod maong ngitngit kaayo ang among dapit labi na ang karsada panahon sa gabii kay wala may gibutang nga mga suga. Maong daghan kaayo mangatang nga badlungon sa mga moagi sa maong lugar.”
Brgy Tangke, Talisay City
“Daghan kaayo mogamit og vulcaseal nga mga batan-on diri sa among lugar wala gyud ni sila mabadlong. Hinaut nga matuman ang gisaad ni DIGONG nga limpyohan sa badlungon sa katilingban ang atong nasud.”
Brgy Dawis-Norte, Carmen, Cebu
“Nganong mahal man kaayo ang barangay clearance diri sa among lugar tag 55 pesos ang ilang pangayo. Pait kaayo para namong mga pobre intawon Sir kay maglisod pagbayad sa maong kantidad, maayo unta’g maminosan ni siya.”
Brgy Sangi, Toledo City
“Gipasagdan na man lang ni sa atong otoridad ang operations illegal swertres diri sa among syudad labi na sa among barangay padung sa Dumlog kay grabi na kaayo ka plastada. Alaot ug alkanse kaayo ang legal nga swertres operators kay maalkanse na lang tungod sa ilegal nga operations sa swertres.”
Brgy Ibabao, Cordova, Cebu
“Hangtud karon pabilin gihapon namong problema ang ilegal nga kalihukan diri sa among lugar apil na sa Brgy Dapitan ug uban pang lugar. Gusto namong ipa-Duterte ang mga tawo nga nalambigit aron mahunong na ni sila sa ilegal nila nga kalihukan."
* * *
Alang sa mga reklamo text lang sa 09326425494
- Latest
