Ang ihap nagpadayon

Sa adlaw nga Biyernes Hulyo 22, 2016 miabot na sa 109, 054 ang mga mitahan nga mga tiggamitan og ginadiling drugas ingon man mga nagbaligya niini sigun sa taho sa GMA News Online.

Kini ang resulta sa pagtuktok ug paghangyo sa mga polis sa 62,000 ka mga panimalay ug mga nagpuyo niini lukop nasud.

Sa 109, 054  ka mga mitahan,  7, 111 kanila ang mga tigbaligya og ginadiling drugas. Gawas niini, ang kapolisan nakadakop usab og 3, 213 ka mga tigpayuhot og drugas.

Sa mga mitahan, 239 na kanila ang napatay sa mga polis human mibalik sa naandan nilang gawi ang pagpamaligya gihapon sa gidiling drugas. Sa 239 ka mga napatay, 175 kanila ang napatay sa mga polis human misukol dihang gironda ang ilang balay ug baligyaanan og gidiling drugas samtang 96 kanila ang napatay sa vigilante style nga pagpatay.

 Sa 239 na nga napatay, 101 kanila ang sa Metro Manila, 30 ang sa Bulacan ug 140 kanila ang gipatay sa nagkalain-laing dapit sa nasud.

Kining maong gidaghanon wala pa kini labot sa lain na usab nga gipatay nianang pagkasunod adlaw Hulyo 23 lukop nasud.

Si PNP Director General Ronald "Bato" Dela Rosa miingon sa mga tigbalita nga magpadayon pa ang ihap niadtong mga mamatay tungod sa ilang pagpadayon sa pagpamaligya og gidiling drugas human sila tuktoka ug hangyoa.

Ang mga napatay dili na makabasol sa mga polis ug kagamhanan kay gihatagan na sila og kahigayonan nga magbag-o sa ilang kinabuhi.

 Busa maingon nato nga ila gayod nga tinuyoan ang mapatay sa mga polis nga ilang gikingkoy human nila ilara sa pagtahan kunohay sa ilang kaugalingon pero igo ra diay nga nakisakay sa uso kay mibalik ra diay gihapon sa ilang gidiling negosyo.