Alas ni Tommy
Nakugang pagkakita ni Cebu City Mayor-elect Tommy Osmeña nga nagbarug na atubangan sa among remote camera daplin sa V. Rama Avenue sa Barangay Guadalupe bisan wa pang kasugod ang among TV Patrol Central Visayas niadtong Biyernes. Niuyon siyang magpa-interview on cam apan wa mi magpaabot nga labihan niyang sayoha.
Naanad man gud mi sa nangaging TV interviews nga niabot siya dayon nang sugod sa iyang segment, kasagaran nauwahi pa. May mga higayon gani nga tungod sa kadaghan sa mga gimbuhaton nagpa-interview ra sa telepono o nibalibad gyud. Nidaog na siya sa piniliay busa wa na gyud unta kinahanglana nga mobarug daplin sa dan pagpanubag og mga pangutana.
* * *
Mas nakugang ko pagkakita nga gihangop niya ang mga molupyo nga niduol niya. Gihikap niyang mga ulo sa ni-amen nga mga bata, kasagaran mga tinun-an, gilamano ang ilang mga ginikanan ug giwarawarahan ang nangagi nga mga pasahero ug mga motorista. May nakahunghong bang Osmeña nga nahuman nang kampanya?
Samtang nagsibya mi sa pasiunang mga balita dayong interview niya, nabalaka ko pagkakita nga direkta siyang naigo sa suwaw sa adlaw ug nanabon sa iyang mga mata. Mahimo ra gyud unta siyang mobiya ug mangasaba sa among crew nganong wa dayon namo siya ibutang sa kamera. Apan nagpabilin siya ug mapahiyumong nagpaabot sa iyang turno.
* * *
Suod nga mga higala ni Osmeña nga akong gisuginlan sa kahibung sa dako niyang kausaban nitug-an nga atubangan sa ilang kabalaka sa nagbuntaog nga mga suliran sa City Hall nga iyang pulihan gaan ang buot ni Osmeña nga nangandam pagbanos pagduma sa dakbayan human sa unom ka tuig nga haw-ang. Matud nila ang wa mahibaw-i sa kadaghanan mao nga bisan nidaog na sa piniliay si Osmeña nagpadayon sa iyang mga pulong-pulong sa nagkalainlaing mga barangay. Gitinuod gyud diay ang pasalig nga bisan sa kadagko sa iyang mga plano alang sa dakbayan mangonsulta una siya sa tanang maapektahan nga mga sektor.
* * *
Bisan kapila na balikbalika og pangutana mahitungod sa dakong mayoriya sa Team Rama sa City Council, wa mopakita og kabalaka si Osmeña. Nagsige lang og pasumbingay nga, “tan-awon lang nato.” Mahimong tungod ni sa gibutyag sa kasaligang mga tinubdan nga duna nay mga konsehal sa Team Rama nga nipadayag og kaandam sa pagbalhin sa Bando Osmeña Pundok Kauswagan (BOPK).
Sa niaging unom ka tuig, si suspended City Mayor Mike Rama nipasundayag sa talagsaong katakos paggasto og kuwarta linaktawan ang City Council. Gibaraw hinuon ang pipila sa iyang mga transaksiyon sa Commission on Audit (COA). Apan si Osmeña ang magtutudlo ni Rama ug ubang kanhi alyado nga karon nibatok na niya. Tingali kana ug ang mas mahigalaon na nga personalidad mao ang iyang mga alas batok nila.
* * *
- Latest
