Happy 50th anniversary, 7RCDG!

Akong mga pahalipay sa mga opisyal sa 7th Regional Community Defense Group nga nagsaulog sa ika-50 nga adlaw sa kasumaran sa pagtukod niini niadtong Mayo 24, 1966.

Usa ka simpleng selebrasyon ang gihimo kagahapon nga gibuksan sa usa ka Santos nga Misa nga gisaulog ni Fr. Major Cyril Cardinal, SDB, sa conference room sa 7RCDG.

Si Col. Pascual Luis Bedia, ang commander sa Army Reserve Command mipadala sa iyang deputy commander nga si Col. Natalio Jayson nga usa ka Sugboanon, aron duyogan ang mga opisyal, kasundalohan ug mga Army Reservists pagsaulog sa kasumaran.

Human sa misa, gihimo ang off-base lunch ug pagkahuman gihimo ang conference tali sa mga sakop sa 7RCDG nga gipanguluhan sa commander niini nga si Col. Nestor Abando, uban sa commander sa 1901st Infantry Brigade Ready Reserve nga si Col. Erik Miguel Espina, umaabot commander sa 1st Dumaguete Ready Reserve Battalion nga si Lt. Col. Tiburcio Adrian Umbac, direktor sa 701st Cebu Community Defense Center nga si Lt. Col. Merrill Sumalinog, Lt. Col. Barrete, director sa 702nd Bohol Community Defense Center, Major Gador, Major Rosie Galvadores sa Capt. Rafael Luche sa 1st Cebu Ready Reserve Battalion.

Gituki sa conference ang umaabot nga medical mission sa kasundalohan pag-abag sa mga parokya sa Artsidyosesis sa Sugbo ug sa ubang buot moabag sa mga misyon sa kaluoy sa katawhan.

Lakip sa gituki ang mga schooling ug advancement training sa mga Army Reservists.

* **

Nganong supakon man ang mga desisyon ni Davao City Mayor Rodrigo Duterte karon nga wala pa siya mahimong presidente?

Kun aduna siyay mga pronouncements karon, mahibaw-an nato kun angayan ba o dili unya na kun makalingkod na si Duterte human unya sa iyang pagpanumpa sa udto sa Hunyo 30, 2016.

Mentras tanto, pasagdan nato siyang mohulma sa iyang administrasyon nga mao unyay motabang kaniya pagdumala sa iyang administrasyon.

Daghan kaayo kita og mga "basin basin" nga sa tagalong pa, "haka haka" sa mga tawo nga buot niyang ipamutang sa Malacañang. Sama kang Atty. Sal Panelo nga gisugat og mga pagsupak ang iyang appointment unya pagka-Press Secretary. Klaro kanang misupak adunay mga dili maayong kasinatian kang Panelo, apan epektibo ba siya pagka-tigpamaba ni Digong? Kana maoy wala pa nato mahibaw-i. Mentras, maminaw una kita.

Mao bitaw nga mitumaw karon nga estorya nga dili na durian ang paboritong prutas sa Davao City tungod kay daghan ang nangadto bisan didto mitabang sa laing presidentiables sa miaging eleksiyon, unya nangayo og appointment o trabaho sa gobiyerno. Busa, ang prutas sa Davao City karon mao na ang "balimbing" sa kadaghang namali nga si Digong na ang pangulo.

Adunay estorya nga mismo si Mayor Mike Rama milinya didto sa Davao City. Basin nakalimot lang si Mike nga si Jejomar Binay iyang presidente sa miaging eleksiyon.

Sa The Freeman kagahapon, nangaliyupo na gyud si Mike sa tabang ni Digong. Wala gyuy uwaw.