Bana nga langyaw, mamahimo bang maka-inherit?
Dear Atty. Divine,
Usa ko ka Filipina apan naminyo ko og foreigner, akong nabasahan ang imong column on-line hinungdan nga naaghat ko nimo sa pag-email. Duna koy property nga napalit nga house and lot ug kini nakapangan sa akoa lang. Ang akong igsuon maoy nagpuyo sa maong property pagkakaron.
Ang kuwarta sa akong bana maoy gigamit sa pagpalit sa maong property. Nagplano unta ko nga maghimo og Last Will and Testament ug mamahimo ba ang akong bana nga maoy akong binlan sa maong property bisan kun siya usa ka foreigner. Wa man gud mi anak attorney ug iya man sab nga kuwarta ang gigamit sa pagpalit sa maong property, mamahimo ba nga ang house and lot adto nako ibilin niya? Daghang salamat. — Marvy
Dear Marvy,
Ang atong Batakang Balaod nagdili sa usa ka langyaw nga makapanag-iya og real property dinhi sa atong nasud gawas lang kun kini pinaagi sa hereditary succession basi sa Sections 7 and 8, Article XII of the Philippine Constitution. Ang imong bana basi sa atong balaod makonsiderar nga compulsory heir busa isip compulsory heir, dili siya mamahimong hikawan sa iyang katungod sa pag-inherit sa kabtangan nga imong ibilin. Sa ato pa, bisan pa kun siya usa ka langyaw mamahimo siyang makapanunod sa imong house and lot kay pinaagi man sa hereditary succession ang iyang pagpanag-iya niini nga diin maoy exception nga nalatid sa atong batakang balaud. Kun aduna moy anak, ang imong bana ug ang imong anak maoy makapanunod sa imong ibilin nga property. Busa kun maghimo ka og Last Will and Testament ug imong ibilin ang imong house and lot sa imong bana, wa kini mosukwahe sa balaud gawas lang kun aduna kay laing mga anak nga kinahanglan sab nimo nga bahinan sa maong kabtangan nga imong ibilin kanila. Thanks and God Bless. — Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., CebuCity or email sa [email protected] og akong tubagon ang inyong pangutana pinaagi saakong column matag Miyerkules, Sabado og Domingo.
- Latest