Sugod na ang kampanya

Nagsugod na ang kampanya sa mga nasyonal nga kandidato alang sa eleksiyon karong Mayo 9. Nag-iyahay na sila karon og suhid sa nagkalainlaing lugar sa nasud aron pagdani sa mga botante pagsuporta kanila.

Alegre bitaw kining kampanya sa Pilipinas. Dinhi nimo makita ang tinuod nga sirkus sa pulitika. Gani, bisan unsa na lamang ang matang sa pagdani ang himuon sa mga kandidato aron paghakot og mga boto.

Sa mga kandidato pagkapresidente, si Senadora Grace Poe ang unang mitugpa dinhi sa Sugbo alang sa pormal nga kampanya. Tuod man gidumog kini ug ang iyang running-mate nga si Senador Chiz Escudero sa ilang pagpangampanya didto sa University of the Visayas sa dakbayan sa Toledo.

Ug makapaabot kita nga mosunod usab kadtong ubang mga presidential candidates sa sunod nga mga adlaw. Maglumba gayud sila pagkuha sa suporta sa Sugbo, kansang mga botante maoy labing daghan sa tanang lalawigan sa nasud.

Ambot kun si kinsa gayud ang suportahan sa mga Sugbuanon. Sa akong tan-aw, kamulo pa silang nanghimbis sa mga kandidato kun si kinsa gayud ang angayan nga sunod modala sa renda sa pangagamhanan.

Hinuon pipila sa mga presidential candidates ang aduna nay mga kaalyado sa lokal nga mga partido. Sama pananglit ni Bise Presidente Jejomar Binay sa United Nationalist Alliance kinsa nakig-alyansa sa grupo ni Cebu City Mayor Michael Rama ug sa One Cebu party ni gubernatorial candidate Winston Garcia.

Si Mar Roxas, ang pambato sa Liberal Party sa administrasyon, ang gisuportahan usab sa administrasyon sa probinsiya ilalum ni re-electionist Governor Hilario Davide III ug Vice Governor Agnes Magpale. Suportado usab kini sa Alayon, ang partido ni kanhi kongresman Eduardo Gullas sa unang distrito.

Si Poe morag adto makakuha og suporta sa partidong Bakud sa mga Durano sa ikalima nga distrito. Daan nang namahayag si Kongresista Ace Durano niini. Si Durano maoy provincial chairman sa Nationalist People’s Coalition, ang national party nga giingong motuboy sa tandem ni Poe ug Escudero.

 Ambot kaha sa habig ni Senadora Miriam Santiago ug Mayor Rodrigo Duterte. Apan tungod sa giingong bagang kaliwat ni Duterte dinhi sa Sugbo, dili ikalimod nga daghan gayud sa mga Sugboanon ang mosuporta kaniya.

Makaingon kita nga alegre gayud ang umaabot nga kumbati pagkapresidente. Apan kun si kinsay mogawas nga mananaug, klaro nga kadtong adunay dakong makinarya.