EDITORYAL - Hinabang kaniadto, suborno na karon

Sa wala pa ang eleksyon, way daghang kuskos-balungos ang mga politiko sa mga programa ug proyektong gipanghimo sa administrasyon.

Ilang nakita nga responsibilidad sa gobiyerno ang paghatag og kaayohan ug mapalambo ang estado sa kinabuhi sa mga tawo. Apan karong nagkaduol na ang piniliay, lahi na man og tan-aw ang mga anaa sa oposisyon sa mga tabang nga nahatag sa gobiyerno ngadto sa ilang mga konstituwente.

Karon ilaha na kining gitawag og 'suborno' aron makakuha og botos sa usa ka lugar ang mga kandidato sa administrasyon. Ingon na ba niini kahugaw og hunahuna ang mga politiko karon?

Kung dili molihok ang gobiyerno sa mga giyangungo sa katawhan pasanginlan kini nga walay pulos ug kurakot, karon nga nilihok pasanginlan na pud nga nanuborno o ba kaha nangomisyon.

Angay nga timan-an nga kining mga kandidatong manaot na gani sa ilang mga kaatbang, tataw kaayo nga wala na kini laing mahatag pang kaayohan sa nasud.

Tungod kay wala na man silay laing nahuna-hunaan nga produktibo kun dili ang pagbira na lang paubos sa ilang mga kontra.

Nahadlok sila nga sa kadugayan makaamgo ang mga botante nga taphaw ra ilang plataporma de gobiyerno. Ang paghimo og bati nga isyu batok sa kaatbang usa ka pamaagi aron di masentro sa katawhan ang plataporma sa taphaw nga kandidato.

Apan kining ingon niini nga klase sa estratehiya sa pangampanya maoy naghatag og kalibog sa mga botante. Kini maoy hinungdan nganong hangtud karon naglisod og huygo ang nasud aron makaparang sa mga silingan niini sama sa Singapore, Indonesia ug Vietnam.

Tungod kay pirme na lang kadtong popular lang nga mga kandidato ang modaog, sulagma lang ra ba nga ang popular makamao gyud sa panggobiyerno.

Kinahanglang gamitan og konsensya para sa kaugmaon sa sunod nga mga henerasyon sa nasud ang pagpili og kandidato.  Dakong sala kung siradohan sa botante ang hunahuna tungod lang sa popularidad.