Kasaysayan sa Chinese New Year

Kung Hei Fat Choi!. Pagtimbaya alang sa kasaulogan sa Chinese New Year, kon ang "Spring Festival." 

Base sa tradisyonal nga solar calendar sa China, ang unang buwan sa tuig ilang gitawag og "Start of Spring."  Sugdan sa mga insik ang ilang tuig sa pagtikad sa yuta. Panguma ang nag-unang panginabuhian kaniadto sa China tungod sa ilang lapad nga kayutaan.

Sa ilang pagtikad, gipangayo nila ang maayong tubo sa ilang mga tanom ug ang abunda nga ani. Gikan sa panguma nilambo ang maong tradisyon ngadto sa patigayon ug ubang paningkamot sa mga Intsik.

Nunot sa maong tradisyon, may mga estorya-estorya ug patuo-tuo sab. Giingon nga nagsugod ang Chinese New Year kaniadto tungod sa usa ka bangis nga mananap nga ginganlan og Nian.

Ang Nian nga gihulagway nga sama sa lion, giingon nga nagpuyo ilawom sa dagat o sa kabukiran sa China. Mogawas ang mananap sa matag Spring aron mokaon.

Apan ang kan-on niini kasagaran mga bata ug tawo. Sa usa ka village sa China, aron dili sila kan-on sa Nian, magbutang ang mga mag-uumang Instik og mga pagkaon sa gawas sa pultahan sa ilang mga pinuy-anan matag bag-ong tuig aron maoy ipakaon sa Nian.

Usa ka adlaw sa Spring, usa ka Taoist monk nga ginganlan og Hungjon Laozu ang nibisita sa maong village.  Sa iyang pag-abot sa village iyang nakita ang kasubo sa panagway sa mga tawo.

Inay magsadya tungod sa kasaulogan, nagmagul-anon sila. Usa ka batan-on ang iyang gipangutana ug gitug-anan siya sa hinungdan. Nisaad si Hongjun nga iyang pakig-estoryahan ang Nian.

Sa ilang panagharong sa Nian, buot usab unta nga kan-on sa mananap si Hongjun. Apan iyang gihagit ang Nian sa pagkaon sa makahilo nga mga bitin sa kalasangan ug sa pag-abog sa mga bangis nga mananap sa kabukiran.

Human nilampos ang Nian sa maong mga hagit, iya na untang kan-on si Hongjun. Apan dihang naghubo si Hongjun sa iyang sapot ug ang puwa nalang nga undergarments ang nahibilin sa iyang lawas, nahadlok ang Nian nga nakakita sa kolor puwa.

Nagkatawa nga nibalik sa village si Hongjun ug gipahibawo ang mga molupyo sa pagbutang og puwa nga kolor sa ilang mga panimalay ug magpabuto tungod kay mahadlok niini ang Nian.

Sukad niadto, matag bag-ong tuig atol sa Spring, magsul-ob og puwa nga mga senina ang mga Instik, magbitay og puwa nga parol ug puwa nga mga papel sa ilang mga pultahan ug bentana ug magpabuto aron abugon ang Nian.

Wala na magpakita ang Nian ug giingong nadakpan kini ni Hongjun Laozu. Ang maong kasaysayan inyong masabtan pinaagi sa lion dance nga atong masaksihan karon matag Chinese New Year.