Dugang mga bombero
Pormal na nga matapos ang kapin usa ka bulan nga Basic Orientation Course sa mga bag-ong bombero dinhi sa Rehiyon-7, kon Central Visayas.
Pagahimoon ang formal graduation rites sa Batch Liyab ug Buhawi nga andam na unya nga ipang-assign sa nagkalainlaing mga city fire station dinhi sa Metro Cebu.
Milangkob sa ilang training mao ang basic life support, basic fire fighting, rappelling ug uban pa nga mga mahinungdanon kaayo nga mga kahibalo aron hingpit sila nga makaresponde sa panahon nga adunay sunog.
Sa mga outstanding graduates, congratulations for a job well done.
* * *
Sa pikas bahin, adunay 95 ka recruits ang mo-take oath karong Disyembre 1, 2015 human sila nakahuman og proseso sa ilang mga papeles ug human sila nakapasar sa makuti nga recruitment process sa BFP-7.
Mahimo na gyud nga hingpit ang ilang pagsulod sa puwersa sa atong kabomberohan dinhi sa Central Visayas.
Ug sa kataposan, karong Enero 2016 pormal na nga mobuwag ang probinsya sa Negros Oriental gikan sa Central Visayas.
Kini gumikan sa pagkamugna na sa Negros Island Region. Sa ato pa, ang BFP Region-7, may tulo na lang ka probinsya nga sakop -- ang Cebu, Bohol ug Siquijor.
Ang mga personnel nga taga Negros Oriental nga ania ma-assign dinhi sa Region-7 naghinayhinay na sa pagbalhin sa Negros Island Region.
Ang naka-advantage niining gamay na lang ang probinsya nga sakop sa Central Visayas mao nga mas mapalapdan pa ang fire prevention activities ug mahingusgan pa ang mga kalihukan diin ang tumong mao ang pagkab-ot og fire safety community.
- Latest
