Wala’y hakot sa rally

Si Mayor Michael Rama naniguro g’yud nga si Vice President Jejomar Binay maoy modaog pagka presidente sa eleksyon karong sunod tuig.

Ambot og unsa’y gibasehan ni Mayor Rama sa iyang pangangkon nga modaog si Binay pagka presidente. Gani sa kalihukan kaniadto’ng Biyernes sa United Nationalist Alliance (UNA) didto sa Cebu Colesium, mura’g tulo ra ka mayor ang mitambong.

Base sa report sa DYLA nga gawas ni Mayor Rama, ang laing nakit-an nga mitambong mao si Toledo City Mayor Sonny Osmeña ug usa ka mayor sa Biliran.

Nakasigpat ang mga reporters nga gipang-check up ang mga ngalan sa nanambong sa kalihukan gikan sa listahan. Sa ato pa, maisip nga pinugos o binayran?

Unya, dili usab maayo nga ang mga opisyal sa barangay mohakot sa mga tawo sa ilang dapit aron dad-on ug pugson nga motambong sa mga politikanhong kalihukan.

Kining ako, dili kay gitumong lang sa United Nationalist Alliance, kun dili sa kadagkoan sa ubang partido nga unta dili sila mohimo og pagpanghakot aron dili kamo masawayan.

Kinahanglan g’yud nga kita’ng mga botante motan-aw ug motimbang-timbang pag-ayo sa mga kandidato aron pagsuta kun kinsa kanila ang angayan nga botohan ug padag-on.

Ang mga tawo nga angay’ng padag-on mao kadtong walay mga rekord sa pagpangawkaw sa salapi sa kagamhanan ug adunay mga nindot nga nahimo nga nakahatag na og benepisyo sa katawhan.

* * *

Sigurado ko nga ang Partido Liberal diin si Mar Roxas ang standard bearer ug ang partido nga mosapupo ni Senador Grace Poe anhi usab sa Sugbo maghimo og lapad nga rally.

Tan-aw nako, ang makabentaha niini mao g’yud sila si Poe ug Roxas kay pareho sila nga wala malambigit og pagpangawkaw sa salapi sa kagamhanan.

Apan si Poe nag-atubang og kaso nga naglambigit sa iyang citizenship. Apan gihulagway usab nga si Davao City Mayor Rodrigo Duterte lig-on ‘sab nga kandidato pagka presidente.

Daghan lang ang nangahadlok tungod kay nasayod sila sa pamaagi ni Duterte ngano nga gikalisangan siya didto sa Davao.

Adunay nakagusto sa pamaagi ni Duterte, apan daghan ‘sab ang magpanagana. Busa mentras tanto nga layo pa ang eleksyon, hinuktokan g’yud nato pag-ayo kun kinsa ang angay’ng himoon nato nga presidente.

Kanang mga tawo nga dili mangilkil sa kuwarta sa kagamhanan ug sensiro nga manerbisyo.

* * *

Gidayeg nako ang tag-iya sa gitukod nga grahe diha sa entrada sa PC Hills PNCO apartment sa Sitio Maracas, Lahug kay giguba niini ang kabahin sa iyang kural nga miabot na sa aseras.

Saludo ko nimo tsip!