Ro-Ro, Bi-Hon, Po-Chi o Dig-Pet

Gidawat na ni Kongresista Leni Robredo ang hagit sa iyang mga dumadapig nga mopares kang DILG Secretary Mar Roxas alang sa 2016 nga eleksiyon.

Samtang pormal nga gi-anunsiyo ni Leni, human giduso mismo ni Presidente Noynoy Aquino, nga siya’y mo-bise presidente ni Roxas, ang kampo ni Bise Presidente Jejomar Binay nagdalidali usab sa pag-anunsiyo nga gisirad-an nila ang ilang kampo alang kang Senador Bongbog Marcos, kay pormal nang gipares si Senador Gringo Honasan.

Ang makaluluoy ning higayona mao si Bongbong Marcos. Wala gyu’y midawat kaniya nga himuong bise presidente. Ang kampo ni Mayor Digong Duterte sa Davao sirado na man ug si Senador Alan Peter Cayetano ang pares sa mayor.

Nag-una-una sa panagpares silang Senador Grace Poe ug si Chiz Escudero.

Kun mahinayon, tulo ning upat ka mga bise presidente maggikan sa rehiyon sa Bicol. Si Leni natawo ug nagtubo hangtod naminyo sa Naga City, Camarines Sur. Si Chiz natawo sa Manila, apan iyang pamilyang Escudero mga taga Casiguran, Sorsogon diin ang iyang amahan nga si kanhi kongresista Salvador Escudero III nga ministro sa diktador nga si Ferdinand Marcos sa Food and Agriculture sa wala pa ang Edsa People Power revolution, lumad sa maong lugar. Si Gringo natawo sa Baguio City, apan ang iyang amahan nga usa usab ka Colonel sa kasundalohan ug iyang inahan pulos mga taga Sorsogon.

Sa Facebook, ang tandem nilang Roxas ug Robredo gitawag og "Ro-Ro" samtang kang Binay ug Honasan "Bi-Hon" ug kang Grace ug Chiz gitawag og "Po-Chi" (ininsik man). Ang kang Digong ug Cayetano tawgon usab og "Dig-Pet" kun Digong ug Peter.

Nilang upat, si Leni ang mosinaw pag-ayo. Lahi siya nga kandidato ikomparar sa uban. Wala siya’y pangandoy nga mag-bise presidente. Gani, dili niya pangandoy ang mag-kongresista. Nagpakahilom ra gyud siya sa daplin.

Ikomparar  nimo si Leni ni Chiz, layo ra gyud kaayo si Chiz. Aw, nakaila na man kita unsa ka-hudas ni Chiz sa coalition nga nagsuporta kang Noynoy Aquino sa 2010. Kalit ra siyang mitumaw aron pagpulpog sa kandidatura ni Roxas ug gisuod si Binay. Maayo gani wala siya panimasli ni Mar.

Unsa may agi ni Chiz sa iyang pagka-kongresista ug pagka-senador. May mga higala ko nga taga-Sorsogon. Sila mismo miingon nga kun unsa ang Sorsogon kaniadto sa dihang mag-agi-agi pa ko ning lugara niadtong 1994 mao ra gyud gihapon karon. Pobre.

Gawas niini, gibiyaan ni Chiz iyang asawa nga guwapa kay giilisan og artista. Ang pamilyang Heart Evangelista hangtod karon nagpabiling suko ni Chiz.

Si Honasan walay mawala kun mapilde kay mobalik ra kini sa Senado, kay tulo ka tuig pa una mapupos iyang termino. Si Cayetano may laban, apan trabahoonon iyang popularidad nga tikyaob.