EDITORYAL – Pusher pamatyon?

Dili ikalimod nga grabe na g’yud kaayo ang problema sa drugas dinhi sa nasud, apil na sa dakbayan sa Sugbo. Wala gayud mapuo ang ilegal nga drugas bisan sa gihimo’ng paspas nga kampanya sa kapolisan.

Angay na g’yud nga ang atong mga opisyal sa kagamhanan, sama sa mga mayor ug gobernador, molihok na ug ilang ipatawag ang kadagkoan sa kapolisan, ilabi na ang Philippine Drug Enforcement Agency (PDEA), nga wala kaayo molihok aron pagsulbad sa problema.

Daku kaayo og mahimo ang mga opisyal sa kagamhanan aron pugson nga ang mga tinugyanan sa balaod molihok pagsumpo sa problema sa ilegal nga drugas.

Mahimo sila nga morekomendar ngadto sa hepe sa Philippine National Police (PNP) nga ilisan ang ilang opisyal nga wala’y gihimo kabahin sa problema.

Kun ang mga opisyal tinuoray nga misupak sa pagdagsang sa shabu sa tagsa-tagsa nila ka dapit, makahimo sila pag-awhag sa Office of the President nga ilisan ang mga sakop sa PDEA sa ilang lugar.

Dinhi sa Sugbo, maihap ra sa tudlo ang dinagko nga kalampusan sa PDEA bisan og sila g’yud unta ang masayod sa kalihukan sa mga druglord.

Daghan ang nagtuo nga ang mga sakop sa PDEA nagdawatan og suborno gikan sa mga tawo nga ila unta nga dakponon mao nga kanunay’ng kyugpos ang ilang mga bukton.

Kini maoy nakaaghat ni kanhi kongresista Tomas Osmeña, kinsa nangandoy nga mahimo pag-usab nga mayor sa dakbayan sa Sugbo, nga himoon niya nga “priority” ang kampanya sa drugas kun siya modaog.

Gani mibahad si Osmeña nga ipapatay niya ang mga nalambigit sa pagpayuhot sa drugas kun sila mosukol sa mga polis nga mopitol sa dautan nila nga binuhatan.