EDITORYAL – Dili g’yud ta luwas

Masabot kaayo nga ang mga dautang elemento sama sa mga tulisan, mangunguot, mangingilad ug ubang kriminal kuwang na og kahadlok sa mga tigpatuman sa balaod pagka karon.

Ang hinungdan niini mao nga dili na agresibo ang mga polis sa paglutos sa mga badlongon sa katilingban nga kun masakpan sigurado nga mausab ang ilang birthday ngadto na sa Nobiyembre 1. Didto sa dakbayan sa Davao, magpanuko ang mga tawo sa paghimo og mga pagpanulis, ug bisan ang pagpamaligya og gidili nga matang sa drugas kay sigurado nga dili sila katulgan ni Mayor Rodrigo Duterte.

Dili nato mapugos si Mayor Michael Rama nga sun-on si Duterte nga usahay magmaneho og taxi panahon sa gabii aron personal siya nga makasinati sa tinuod nga sitwasyon sa dakbayan.

Sanglit usa  man ka abogado si Mayor Rama, kanunay niya nga gipasiatab nga “rule of law” maoy iyang ipatigbabaw dinhi sa dakbayan sa Sugbo.

Nindot ang iyang baruganan, apan angay usab nga ipakita ni Mayor Rama ngadto sa kapolisan nga sinsero siya sa pagpatunhay sa kahusay ug kalinaw dinhi sa dakbayan.

Kun mobasa ka sa sentimento sa katawhan diha sa social media, imong masayran nga wala kaayo sila makuntento sa sitwasyon sa palibot dinhi sa dakbayan sa Sugbo.

Sa laktud, dili kita luwas nga magsuroy-suroy tungod kay hayan nga anaa ra sa atong palibot ang mga dautang elemento nga moatake kanato kay wala na sila’y kahadlok.

Samtang atong ipatuman ang “rule of law” apan kinahanglan usab nga ipakita nato ngadto sa mga badlongon sa katilingban nga dili pulpol ang mga polis nga ingon sa magpanagana sa paghimo’g aksyon sa mga dautan.